QASIETTI QADIR TÚNINDE TILEKTER QABYL BOLSYN!
Naýryzbaı qajy TAǴANULY
Qazaqstan musylmandary dinı
basqarmasynyń tóraǵasy, Bas múftı
Qurmetti baýyrlar!
Qasıetti Qadir keshi múbárak bolsyn! Alla Taǵala ustaǵan orazalaryńyzdy, jasaǵan qulshylyq-ǵıbadattaryńyzdy qabyl etkeı.
Alla Taǵala Quranda: «Biz shynynda, Qurandy Qadir túninde túsirdik. Qadir túniniń ne ekenin bilesiń be? Qadir túni (qasıet jáne saýap jaǵynan) myń aıdan da qaıyrly. Sol túnde perishtiler jáne Jábireıil Allanyń ámirimen (jer betine Alla taǵdyr etken) barlyq isterdi atqarý úshin túsedi. Sol bir tún, aǵaryp tań atqanǵa deıin amandyq-tynyshtyq túni bolady» («Qadir» súresi, 1-5-aıattar) dep baıandaıdy.
Rasynda, Ramazan aıynyń qasıetti bolýynyń uly erekshelikteriniń biri – Qadir túninde taǵdyrdyń jazylýy. Al Qadir túniniń qasıetti bolýynyń máni – adamzat balasyn eki dúnıe baqytyna jeteleýshi qasıetti kitabymyz Qurannyń túsýi. Buǵan tutastaı osy qasıetti túnge qatysty baıandalǵan «Qadir» súresi dálel bolady.
Aısha anamyz (oǵan Alla razy bolsyn): «Ramazannyń sońǵy on túni kirgen kezde Paıǵambar bilegin sybanyp, túnin qulshylyqpen tiriltken jáne otbasyn da qulshylyqqa oıatqan» deıdi. Bul túni namaz ben Quran oqýdyń saýaby mol. Sonymen qatar Alladan kóbirek keshirim surap, duǵa jasaýdy umytpaıyq.
Birde Aısha anamyz (oǵan Alla razy bolsyn) ardaqty Paıǵambarymyz Muhammedten (oǵan Allanyń salaýaty men sálemi bolsyn): «Ýa, Allanyń Elshisi, Qadir túninde qandaı duǵa tileıin?» dep suraıdy. Sonda Paıǵambarymyz (oǵan Allanyń salaýaty men sálemi bolsyn): «Alla, rasynda, Sen keshirimdisiń jáne keshirgendi jaqsy kóresiń. Meni keshire kórshi» dep aıtasyń» dep jaýap bergen. Hadısterdiń birinde: «Kim de kim Qadir túni ımanmen jáne saýabyn úmit etip qulshylyq etse, onyń aldyńǵy kúnálary keshiriledi» delingen.
Alla Taǵala barshamyzdyń qate-kemshiligimizdi keshirip, óz meıirimine bólegeı. Rabbymyz Qadir keshinde shynaıy ımanmen jasaǵan duǵalarymyzdy, namazdarymyzdy, bergen sadaqalarymyzdy, oqyǵan Quranymyzdy qabyl etip, saýabyn eselep jazǵaı.
Elimiz aman, jerimiz tynysh, táýelsizdigimiz baıandy bolǵaı! Ámın!
Источник: Aidos
