Qaıyrymdylyq kontserti naýqas sábılerdiń úmitin jalǵady (FOTO)

Qasıetti Ramazan aıynda Astana qalasyndaǵy Jastar saraıynda ótken «Úmitiń úzilmesin» qaıyrymdylyq kontserti sal aýrýyna shaldyqqan Kenjebek Janerke men Álııa Ýálıhanovalardyń úzilgeli turǵan úmitterin jalǵap, erteńge degen senimderin nyǵaıta tústi. Elimizdiń Estrada ánshileriniń qatysýymen ótken qaıyrymdylyq kontserti qorytyndysy boıynsha 405 600 teńge jınalyp, eki búldirshinniń ata-analaryna tabystaldy.

Aıta keteıik, atalmysh eki búldirshinniń de «Zeket» qorynyń Astana qalasyndaǵy ókildiginiń qamqorlyǵyna bólenip kele jatqanyna birshama ýaqyt bolǵan. Osy ýaqytqa deıin qor qyzmetkerleri eki sábıdiń anasy Álııa men Sandýǵashqa materıaldyq qoldaýmen kórsetýmen qatar, rýhanı turǵydan da jigerlendirip, taǵdyr synaǵyna tózimdilik tanytýǵa kómektesip keledi.

Qashanda qasynan tabylyp, qamqorlyq tanytýǵa daıyn turatyn qor qyzmetkerleri qaıyrymdylyq kontsertin uıymdastyrýǵa da ujym bolyp jumylyp, qos anaǵa qoldan kelgeninshe kómektesken kórinedi. Al, qor dırektory Ibragım Smataev myrza qaıyrymdylyq kontsertiniń shymyldyǵyn ashyp, izgi tilegin bildirdi. Sondaı-aq, sábılerdiń operatsııasyna arnap «Zeket» qory atynan qarjy tabystap, zalǵa jıylǵan jamaǵatty da jaqsylyqqa úndep, qasıetti aıda atqarǵan árbir izgi amaldyń artyq saýapqa jazylatynyn jetkizdi.