«Qazaq tilindegi dinı sózder men termınderdiń orfografııalyq sózdigi» jaryqqa shyqty (FOTO)
Almatyda ótip jatqan Ǵulamalar keńesiniń HHHIII májilisinde «MUFTIYAT» baspasynan jaryq kórgen «Qazaq tilindegi dinı sózder men termınderdiń orfografııalyq sózdigi» kitabynyń tanytymy ótti.
Jınaqtyń tanytymyna Bas múftı Naýryzbaı qajy Taǵanuly bastaǵan Ǵulamalar keńesi músheleri qatysty.
«Táýelsizdikten keıin shyqqan dinı ádebıetterde, aýdarmalarda, ǵylymı eńbekterde, áleýmettik jelilerde, tipti Qazaqstan musylmandary dinı basqarmasynyń maquldaýymen jaryqqa shyqqan eńbekter men QMDB-ǵa qarasty saıttarda da dinı sózderdiń, termınderdiń jazylýynda birizdiliktiń joq ekendigi baıqalyp turady. Ásirese, dinı eńbekterdi aýdarma jasaǵanda arab, túrik, parsy, orys tilderiniń yqpaly kórinis berip jatady. Osyny eskerip, Qazaqstan musylmandary dinı basqarmasy qazaq tiliniń erejelerine saı din salasyndaǵy sózder men termınderdiń jazylýyn birizge túsirý úshin dinı sózder men termınderiniń orfografııalyq sózdigin qurastyrýdy qolǵa aldy. Bul qazaq tilindegi dinı sózderdiń alǵashqy orfografııalyq sózdigi dep aıtýǵa bolady», – dedi Bas múftı.
Sózdikte qazaq mátinderindegi dinı sózder men sóz tirkesteriniń jáne dinı termınderdiń durys jazylý emlesi kórsetilgen. Sózdiktiń negizgi maqsaty – ıslamı dıskýrstaǵy jáne jalpy ádebı til mátinderindegi dinı sózderdiń durys jazylý normasyn kórsetý. Dinı sózderdegi arab tiline tán keı áripterdiń jazylýyna qatysty eskertýler jeke ereje retinde berildi. Sondaı-aq sózdikti qurastyrýda qazaq tilindegi 500-den astam dinı jáne ádebı eńbekter, oqý quraldary, monografııalar, ǵylymı maqalalar, BAQ materıaldary, dinı resmı saıttar paıdalanyldy.
«Qazaq tilindegi dinı sózder men termınderdiń orfografııalyq sózdigi» jınaǵy Qazaqstan musylmandary dinı basqarmasynyń saraptaý kommıssııasynyń maquldaýynan ótken. A.Baıtursynuly atyndaǵy Til bilimi ınstıtýty Ǵalymdar keńesiniń №16 hattamasymen baspaǵa usynylǵan. Sózdiktiń qurastyrýshysy jáne redaktory – fılologııa ǵylymdarynyń kandıdaty Rashıd Muhıtdınov, jaýapty redaktory – fıolologııa ǵylymdarynyń doktory, professor Quralaı Kúderınova.
