Qazaqstan musylmandary dinı basqarmasy tóraǵasynyń Ortalyq Azııa elderine úndeýi
Asa qamqor, erekshe meıirimdi Allanyń atymen bastaımyn!
Áýeli barlyq madaq álemderdiń Rabbysy Allaǵa tán.
Adamzattyń asyly Muhammed Paıǵambarǵa onyń otbasy men barsha sahabalaryna salaýat pen sálem bolǵaı!
Assalamý alaıkým ýa rahmatýllahı ýá bárákátýhý!
Qurmetti din basshylary, musylman baýyrlar!
Búginde COVID-19 juqpaly derti jer betindegi álem jurtshylyǵyn alańdatyp otyrǵany barshańyzǵa málim. Ókinishke qaraı, bul indetten álemde myńdaǵan adam kóz jumdy. Álemde osy dertten qaza taýyp, qara jamylǵan otbasylardyń qaıǵylaryna ortaqtasyp, kóńil aıtamyn. Alla aldynan jarylqasyn!
Ómir – synaq, jaqsylyqpen qosa qıyndyq ta qatar júredi. Musylman balasy basyna qıyndyq tússe, tózimdilik tanytady, nyǵmetke bólense, shúkir etedi. Qıyndyqty sabyrǵa jeńdirgen pende Allanyń meıirimine bólenedi. Alla Taǵala: «Sózsiz Biz senderdi qorqynyshpen, ashtyqpen jáne dúnıe-múlikterińdi, jandaryńdy, sondaı-aq jemisterińdi alý arqyly synaımyz. Sabyr etýshilerdi súıinshile!» («Baqara» súresi, 155-aıat) degen. Alla Taǵala synaqqa sabyr etip, saýapqa kenelgen pendelerinen etkeı!
Qadirli musylman jurtshylyǵy!
Qazirgi tańda bul aýyr indet kúlli adamzat balasyna qater tóndirip otyr. Biz (bárimiz) Adam ata jáne Haýa anadan taraǵan bir úmbetpiz. Bul indetke duǵa jasaý arqyly qarsy turýymyz qajet. Sebebi duǵa – musylmannyń qorǵany. Qasıetti Quran Kárimde: «Rabbylaryń: «Maǵan jalbaryńdar! Tilekterińdi qabyldaımyn» («Ǵafır» súresi, 60-aıat) degen.
Ardaqty Paıǵambarymyz (oǵan Allanyń salaýaty men sálemi bolsyn): «Aýrýlaryńdy sadaqamen emdeńder, bále-jaladan duǵa jasaý arqyly qorǵanyńdar ...» dep, duǵa etýdiń qanshalyqty mańyzdy ekenine nazar aýdarǵan.
Shartarapqa jaıylǵan indettiń aldyn alýda adamzat Uly Jaratýshynyń meıirimine muqtaj ekenin aıqyn sezinýde. Sol úshin árbir ult ókili, barsha adam balasy judyryqtaı jumylyp, shyn júrekten Jaratqanǵa jalbarynyp, adamzattyń amandyǵyn suraıtyn syndarly sátte turmyz. Allanyń ardaqty elshisi (oǵan Allanyń salaýaty men sálemi bolsyn): «Arapa – artyqshylyǵy mol kún. Arapa artyqshylyǵy jaǵynan qasıetti juma kúnine uqsas. Ol jumadan basqa kúni jasalǵan jetpis qajylyqtan artyq. Duǵalardyń eń jaqsysy da – Arapa kúni jasalǵan duǵa» deıdi.
Osy rette Qazaqstan musylmandary dinı basqarmasy Ortalyq Azııa elderiniń ǵulamalaryn, kúlli din qaıratkerlerin, din salasynyń oqytýshy-ustazdary, qarılardy jáne barsha musylman qaýymyn 30 shilde, beısenbi kúni besin namazynyń ýaqytynda «Bir mezette – bir duǵa» atty ıgi bastama aıasynda kúlli adamzattyń amandyǵy úshin bir ýaqytta alaqan jaıyp, duǵa jasaýǵa úndeıdi.
Asa Meıirimdi Alla Taǵala kúlli adamzat balasyna amandyq-saýlyq berip, aýrý-syrqaýdan aıyǵyp, qýanyshty kúnderge tezirek jetýdi násip etkeı. Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy,
Bas múftı
29 shilde, 2020 jyl,
Nur-Sultan qalasy
