Qazaqstandaǵy ıslam tarıhy» kitaby oqyrmanǵa jol tartty (FOTO)
Almatyda ótip jatqan Ǵulamalar keńesiniń HHHIII májilisinde Bas múftı Naýryzbaı qajy Taǵanulynyń jetekshiligimen jaryq kórgen «Qazaqstandaǵy Islam tarıhy» oqý quralynyń tanytymy ótti.
«MUFTIYAT» baspasynan jaryq kórgen jańa kitaptyń tanytymyna QMDB Tóraǵasy Naýryzbaı qajy Taǵanuly bastaǵan Ǵulamalar keńesi músheleri qatysty.
«Qazaqstandaǵy Islam tarıhy» kitabynda Qazaqstan halqynyń dástúrli senimi – Islam dininiń Ortalyq Azııa men Deshti Qypshaq dalasyna taralý tarıhy naqty derekter arqyly kórsetilgen. Kitapta Ázireti Omardyń (Alla oǵan razy bolsyn) hadıske arqa súıep, túrkilermen beıbit qatynasta bolýy, ámaýılerdiń túrkilerge qarsy fath joryqtaryn uıymdastyrýy, Túrkesh bıleýshileriniń óz aýmaqtaryn qorǵaýy, jeńýi jáne jeńilýi, jik-jikke bólinýi, Talas ǵazaýatynyń barysy men sıpattamasy zerdelenedi. Sondaı-aq túrkiler arasyna Islam dininiń taralýyna yqpal etken Samanı, Ǵaznaýı, Tahırı, Ǵurı, Mámýnı, Altýntash, Qarahan, Horezmshah, Hazarııa, Edil bulǵarlary, Altyn Orda memleketteriniń tarıhy jan-jaqty taldanady.
Bul kitap elimizdegi medrese-kolledjder, saýat ashý jáne qarılar ortalyqtarynyń shákirtteri, ýnıversıtet stýdentteri, magıstranttar, doktoranttar jáne jalpy kópshiliktiń dinı, rýhanı, tarıhı tanymyn arttyrary anyq.
Zertteý barysynda Islam tarıhynyń belgili ǵalymdary ál-Idrısı, Zákárııa ıbn Kazýnı, Qýdama ıbn Jaǵfar, Ibn Hordabek, ál-Maqdısı, ál-Bakrı, Orýn Qoılaqı, Ibn ál-Ásır, Kashıfı, Ibn Hallıkan, Hazını, Jámıdiń klassıkalyq eńbekteri men keıingi irgeli ǵalymdardyń zertteýleri negizgi derekkóz retinde qarastyryldy.
«Qazaqstandaǵy Islam tarıhy» kitabyn elimizge belgili ǵalymdar Muhan Isahan men Aqmaral Satybaldıeva daıyndady. Kitapqa Din isteri komıteti dintaný saraptamasynyń oń qorytyndysy berilgen. QMDB-nyń saraptaý komıssııasy maquldaǵan.
