Qajylyq mıssııasy Mekkede jumysyn bastady (FOTO)
Qazaqstan qajylyq mıssııasy ókilderi Saýd Arabııasynyń Mekke qalasynda arnaıy jıyn ótkizip, jumysyn bastady.
Jıynǵa Qazaqstan qajylyq mıssııasynyń tóraǵasy, naıb múftı Ershat qajy Ońǵar, Bas múftıdiń keńesshisi Bıjigit Nurjigituly, Qajylyq bóliminiń meńgerýshisi Jándillá Bekjigitov jáne basqa da mıssııa músheleri qatysty.
Mekkedegi alǵashqy otyrys barysynda mıssııa tóraǵasy arnaıy jumys josparyn bekitip, mıssııa múshelerine tıisti tapsyrmalar berdi.
«Bıylǵy Arapa qasıetti juma kúnine dóp kelip tur. Munyń ózi úlken nyǵmet. Sondyqtan qajylarymyzdyń qulshylyǵyn durys oryndaýy úshin laıyqty qyzmet kórsetýimiz qajet. Ár iste baısaldylyqpen, sabyrlyqpen, yqylaspen áreket etýimiz qajet», – dedi Ershat qajy Ońǵar. Sondaı-aq uıymdastyrý, aqparat taratý, ýaǵyz aıtý, dárigerlik kómek, qajylyqqa qatysty suraqtarǵa jaýap berý t.b baǵyttar boıynsha atqarylyp jatqan jumystar jaıly baıandaldy.
Bas múftıdiń keńesshisi Bıjigit Nurjigituly 14 týrıstik fırmaǵa bólinip berilgen QMDB ımamdarynyń ýaǵyz-nasıhat jumystaryn jetildirip, jat aǵymdy nasıhattaýǵa jol bermeý kerektigin atap ótse, Qajylyq bóliminiń meńgerýshisi Jándillá Bekjigitov osy ýaqytqa deıin 5 reıs arqyly elimizden 1060 otandasymyz Mekke men Mádına qalalaryna kelgenin baıandady.
Aıta keteıik, Qazaqstan qajylyq mıssııasy jumysyn 5 baǵyt (uıymdastyrý, ýaǵyz-nasıhat, alǵashqy dárigerlik kómek, aqparat jáne Sall ortalyǵy) boıynsha júrgizedi. Mıssııa músheleri qajylyq kompanııalarynyń qyzmeti, jerlesterimizdiń jaı-kúıi men densaýlyǵy, ýaǵyz-nasıhat jumystarynyń júrgizilýi jáne eń bastysy otandastarymyzdyń qajylyq paryzyn durys oryndaýyn qadaǵalaıdy.
