QMDB: 2022 JYLDYŃ QORYTYNDY TÓRALQA MÁJILISI BASTALDY (FOTO)
Elordada Qazaqstan musylmandary dinı basqarmasynyń keńeıtilgen Tóralqa májilisi bastaldy.
Bas múftı Naýryzbaı qajy Taǵanulynyń tóraǵalyǵymen ótip jatqan 2022 jyldyń qorytyndy jıynyna naıb múftıler, Dinı basqarmanyń bólim basshylary men mamandary, sondaı-aq 20 ókildiktiń bas ımamdary qatysýda.
Qasıetti Quran Kárim aıattaryn oqýmen bastalǵan jıynda QMDB Tóraǵasy, Bas múftı Naýryzbaı qajy Taǵanuly: «Allaǵa shúkir, biz osy jyldy jaqsy nátıjelermen qorytyndylap otyrmyz. Elimiz úshin túrli synaqtarǵa toly ótken 2022 jyly da Qazaqstan musylmandary dinı basqarmasy men oǵan qarasty meshit ımamdary, barsha din qyzmetkerleri halyqpen birge boldy. Qınalǵanǵa qol ushyn sozyp, qaıǵyrǵannyń muńyn bólistik. «Islam – yntymaq pen birlik jyly» aıasynda birneshe konferentsııa ótkizdik. QMDB janynan respýblıkalyq Aqsaqaldar keńesi, bizdiń bastamamyzben Túrkistanda Túrki memleketteriniń «Múftıler alqasy» quryldy. Bir jylda 77 meshit jamaǵattyń ıgiligine berildi. Sonyń ishinde munarasy kókpen talasyp, alyp kúmbezi tórtkúl dúnıeni tamsandyrǵan elordadaǵy Respýblıkalyq bas meshitti erekshe atap ótýimiz kerek.
Mysyr, Túrkııa, Saýd Arabııasy Koroldigi men Marokko Koroldigine jasaǵan resmı saparymyz jemisti boldy» dedi.
Aıta keteıik, búgin keńeıtilgen Tóralqa májilisinde oblys bas ımamdarynyń 2022 jyly atqarǵan jumystarynyń esebi tyńdalýda.
