QMDB DELEGATsIIaSY VAShINGTONDA QAZAQ DIASPORASYMEN RÝHANI KEZDESÝ ÓTKIZDI
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly bastaǵan QMDB delegatsııasy Amerıka Qurama Shtattaryna jasalǵan jumys sapar aıasynda AQSh-taǵy Qazaqstan Respýblıkasynyń Elshiliginiń uıytqy bolýymen Vashıngton qalasynda turatyn qazaq dıaspora ókilderi men stýdenttermen rýhanı kezdesý ótkizdi.
Kezdesýge QMDB Ýaǵyz-nasıhat bóliminiń meńgerýshisi Batyrjan Mansurov pen QMDB Ǵulamalar keńesiniń, Respýblıkalyq aqparattyq-nasıhat tobynyń múshesi Arman Qýanyshbaev ta qatysty.
Rýhanı basqosýda Bas múftı jamaǵatqa «Islam jáne dástúr qundylyǵy» taqyrybynda nasıhat aıtyp, din men ulttyq salt-dástúrdiń ózara sabaqtastyǵyna keńinen toqtaldy. Sondaı-aq qazaq halqynyń ǵasyrlar boıy ustanyp kele jatqan hanafı mázhaby men matýrıdı senim mektebi halqymyzdyń rýhanı bolmysymen bite qaınasqanyn atap ótti.
Bas múftı sózinde ıslam sharıǵatynda ǵuryp pen dástúrdiń orny bar ekenin túsindirip, Quran aıattary men hadısterge súıene otyryp, sharıǵatqa qaıshy kelmeıtin salt-dástúrlerdiń tárbıelik mánin jetkizdi. Nasıhat barysynda azan shaqyryp at qoıý, er balany súndetteý, qonaqjaılyq jáne kórshi aqysyn óteý syndy qazaq qoǵamynda ornyqqan dástúrlerdiń ıslammen úndestigi baıandaldy.
Sonymen qatar Bas múftı shetelde júrgen otandastardy ulttyq bolmys pen rýhanı tamyrdan ajyramaýǵa, din men dástúrdi qatar ustanýǵa shaqyrdy. Jáne ıslam dini ár ulttyń ıgi dástúrlerin saqtaı otyryp, izgilik pen tatýlyqqa úndeıtinin atap ótti.
Kezdesý sońynda jamaǵat kókeıdegi suraqtaryn qoıyp, erkin formatta pikir almasty. Rýhanı jıyn sheteldegi otandastarmen baılanysty nyǵaıtýǵa jáne olardyń dinı saýattylyǵyn arttyrýǵa baǵyttaldy.
