QMDB EL TURǴYNDARYN TYNYShTYQQA ShAQYRADY
Qurmetti otandastar!
Qazaqstan musylmandary dinı basqarmasy eldegi ahýalǵa alańdaýshylyq bildirip, el turǵyndaryn tynyshtyqqa shaqyrady. Máseleniń oń sheshimin tabýyn tilep, eldiń tynyshtyǵy úshin duǵa jasaýǵa úndeıdi. Óıtkeni biz úshin dál qazirgi ýaqytta eldiń amandyǵy, jurttyń tynyshtyǵy qymbat.
Musylman qaı kezde de beıbitshilikti, tynyshtyqty, tatýlyqty ózine serik etedi.
Ardaqty Paıǵambarymyz (oǵan Allanyń salaýaty men sálemi bolsyn) hadısinde: «Naǵyz musylman – ózge musylmandarǵa tilimen de, qolymen de zııan tıgizbegen adam» degen bolatyn. Sondyqtan bárimiz úshin osyndaı syn saǵatta memleketimizdiń tynyshtyǵy, halqymyzdyń amandyǵy, táýelsizdigimizdiń baıandy bolmaǵy mańyzdy.
Qadirli aǵaıyn!
Halyq arasyndaǵy birligimizge syzat túsiretin jaǵdaıǵa boı aldyrmaıyq, arandatýshylyqqa jol bermeıik. Sabyrǵa kelip, birlik saqtap, eldegi ahýaldyń túzelip, jaǵdaıdyń turaqtanýyna sep bolaıyq. Aqtamberdi jyraý «Balalaryma ósıet: Qylmańyzdar kepıet, Birligińnen aıyrylma, Birlikte bar qasıet» dep jyrlaǵan bolatyn.
Mundaı jaǵdaıda ózara senim bildirý, aqylǵa júginý, tártipsizdikke boı aldyrmaý asa mańyzdy. Sebebi bizdiń eldiń tiregi de, tilegi de – beıbitshilik pen bereke-birlik.
Dana halqymyz aıtqandaı, «Baılyq baılyq emes, birlik – baılyq». Alla Taǵala halqymyzdy alaýyzdyqtan saqtap, birligi jarasqan Máńgilik El bolýymyzdy násip etkeı! Jaratýshy Iemiz elimizge qut-bereke darytsyn!
