QMDB Elorda jurtyna aýyzashar berdi (foto)
Keshe elordada Qazaqstan musylmandary dinı basqarmasynyń uıymdastyrýymen memleket pen qoǵam qaıratkerleri, musylman elderiniń qurmetti elshileri, óner men mádenıet qaıratkerleri, zııaly qaýym jáne BAQ ókilderine aýyzashar berildi. QMDB aýyzasharyna sondaı-aq Qarııalar úıiniń aqsaqaldary, Balalar úıiniń tárbıelenýshileri men meshit jamaǵaty da qatysty.
«Ramazan – bereke aıy» aýyzashar dastarqanynda Quran oqylyp, ómirden ótken marqumdardyń rýhyna duǵa baǵyshtaldy. Sondaı-aq oraza aıynyń qadir-qasıeti men ǵıbrat-taǵylymyna arnalǵan beınerolık kórsetildi.
Aýyzashar sharasynda alǵash bolyp sóz alǵan QMDB Tóraǵasy, Bas múftı, Naýryzbaı qajy Taǵanuly jınalǵan qaýymdy Ramazan aıymen quttyqtap, ár shańyraqqa baqyt pen bereke tiledi.
«Ramazan – tárbıe men taǵylym aıy. Qasıetti aıda musylman balasy qanaǵat, shúkir, meıirim, baýyrmaldyq, keshirim syndy kórkem minezdi qalyptastyrýǵa tyrysady. Óıtkeni qasıetti aıda musylmanǵa kóp jaqsylyq pen múmkindikter beriledi. Oraza ustaǵan adam árbir amalyn kórkem túrde oryndaýǵa tyrysady. Óıtkeni ony «orazam buzylyp ketpese eken» degen oı mazalaıdy. Sondyqtan aýyz bekitken kisi Paıǵambarymyz (oǵan Allanyń salaýaty men sálemi bolsyn) úıretkendeı, ádep bilmes jandardyń dóreki áreketterine «men orazamyn» dep kórkem túrde jaýap qaıtarady. Sebebi Islam – kórkem minez ben ádeptilikke negizdelgen din. Ádeptilik adamdy kórikti etedi. Ihsan ilimi men otyz kúngi oraza kórkem minez ben adamǵa tán kúlli ádeptilikti qalyptastyrady. Saýaby eselenip jazylatyn aıda árbir izgi amalymyz qabyl bolǵaı! Alla Taǵala ustaǵan orazamyzdy, qoǵam úshin jasalǵan qaıyrly isterimizdi mol saýaptan jazǵaı! Elimiz aman, jerimiz tynysh, táýelsizdigimiz baıandy bolǵaı!» dedi Naýryzbaı qajy Taǵanuly.
Is-shara barysynda Bas múftı Qarııalar úıiniń aqsaqaldary, Balalar úıiniń tárbıelenýshilerine arnaýly syı-sııapatyn usyndy.
Aýyzashar dastarqanynda el aǵalary Bas múftıge alǵys bildirip, Dinı basqarmanyń ıgi bastamalaryna sáttilik tilese, Qurmash Mahanov, Erlan Rysqalı bastaǵan óner tarlandary ıláhı ánder men jarapazan jyryn oryndap, basqosýdyń sánin keltirdi.
