QMDB Ǵulamalar keńesiniń HHVI májilisi bastaldy (FOTO)
Elordada Qazaqstan musylmandary dinı basqarmasy Ǵulamalar keńesiniń HHVI májilisi bastaldy. Májiliske QMDB Tóraǵasy, Bas múftı Naýryzbaı qajy Taǵanuly, múftııatty ár jyldary basqarǵan Erjan qajy Malǵajyuly, Serikbaı qajy Oraz jáne keńes músheleri qatysýda.
Májilisti ashqan Bas múftı Naýryzbaı qajy Taǵanuly: «Ǵulamalar keńesi sharıǵatymyzdyń negizderine súıene otyryp, qoǵamda musylman qaýymy arasynda týyndap otyrǵan kókeıkesti, túıtkildi máselelerdi talqylap, der kezinde sheshimder shyǵaryp, pátýalar men kontseptýaldy qujattar qabyldap keledi. Sanaýly merzim ishinde pármendi qurylym, ınstıtýt bolyp qalyptasty. Keńes qurylǵan kúnnen bastap 25 májilis ótti. Búgingi kúnge deıin 24 kontseptýaldy qujat qabyldanyp, sharıǵı, áleýmettik, medıtsına, otbasy, neke baǵytyndaǵy taqyryptarǵa oraı 85 pátýa bekitildi. Sonymen qatar Keńes otyrysynda 8 kitap talqylanyp, baspaǵa usynyldy. Munyń bári sizderdiń belsendi jumystaryńyzdyń arqasynda iske asyp keledi. Osy oraıda barshańyzǵa shynaıy alǵysymdy bildiremin» dep atap ótti.
Búgingi májiliste «As berý mádenıeti», «Zırat pen zııarat mádenıeti», «Zııatker ımam tujyrymdamasy», «Islamdaǵy jastardyń tulǵalyq beınesi», «Dem salý erejesi», «Kıeli oryndardy zııarat etý erejesi», «Tutyný kooperatıvi arqyly turǵyn úı alý úkimi» syndy qujattar men pátýalar talqylanýda.
QMDB Ǵulamalar keńesi qabyldaǵan pátýalardyń mátinin aldaǵy ýaqytta jarııalaımyz.
