QMDB ǴULAMALAR KEŃESINIŃ XXXVII MÁJILISI BASTALDY (FOTO)

Búgin Almaty qalasynda Ortalyq meshitte Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasy janyndaǵy Ǵulamalar keńesiniń XXXVII májilisi bastaldy.

Májilis jumysyn ashqan QMDB Tóraǵasy Naýryzbaı qajy Taǵanuly: «Bıylǵy 2023 jyldy ózderińizdiń qoldaýlaryńyzben «Islam jáne izgi qoǵam» jyly dep jarııaladyq. Osy jyl aıasynda birqatar ıgi jumystarymyzdy bastap kettik. Igi isterimizge sizder de úles qosyp kelesizder. Alla razy bolsyn. Halyq tarapynan aýktsıonǵa, tenderge qatysý úkimi, ushyr nısaby men shyǵynyna qatysty úkim týraly suraqtar kelip túsýde. Alla qalasa, búgin osy máselelerge qatysty ázirlengen pátýalardyń mazmuny men mátinin talqylaıtyn bolamyz. Sonymen qatar birqatar qujat jobasyn osy májiliste talqylap, bekitsek degen oıdamyz» dedi.

Ǵulamalar keńesinde sonymen qatar QMDB-nyń rýhanı, dinı, ulttyq qundylyqtardy nasıhattaýdaǵy róli, QMDB-nyń 2023-2027 jyldarǵa arnalǵan strategııalyq damý baǵdarlamasy, Respýblıkalyq jáne jergilikti aqparattyq-nasıhat toby múshelerine arnalǵan qujattardyń jobalary talqylanýda. Keńes jumysy erteń de jalǵasady.

​