«QMDB Halal oqytý ortalyǵynda» semınar bastaldy (FOTO)
«QMDB Halal oqytý ortalyǵynda» óńirlik mamandardyń bilimin jetildirýge arnalǵan úsh kúndik oqý-semınar bastaldy. Semınarǵa «Halal Damý» dırektory Aıbek Asqarbekuly, sharıǵat jáne pátýa mamandary, standarttaý jáne sertıfıkattaý salasyndaǵy qyzmetkerler jáne elimizdiń ár aımaǵynan kelgen tehnologtar qatysty.
Aıbek Asqarbekulynyń dárisimen bastalǵan semınardyń alǵashqy sabaǵynda Dinı basqarmanyń mańyzdy salalarynyń biri sanalatyn «halal standarttaý jáne sertıfıkattaý» baǵytynyń mańyzy, sertıfıkattaý qyzmetine jaýapkershilikpen qaraý, adaldyq pen kásibı biliktilikti arttyrý máseleleri ortaǵa salyndy.
«Jahandaný zamanynda qyzmetkerlerdiń biliktiligin arttyrý, mamannyń kásibı órleýi kásiporyn qyzmetin jandandyrýda asa qajet. Osy oraıda Dinı basqarma mamandarynyń tálimgerligimen biliktilikti arttyrý oqý-semınaryn uıymdastyrý qolǵa alyndy. Úsh kúnge sozylatyn semınarda qatysýshylar «Halal Damý» bekitken 6 standart boıynsha dáris tyńdaıdy. Tek teorııamen ǵana shektelmeı, qatysýshylardy óndiris oryndaryna aparyp, aýdıt jumysynyń oryndalý barysymen tanystyrady. Semınar sońynda mamandarǵa arnaıy sertıfıkat tabystalady» degen Aıbek Asqarbekuly bul is-shara – otandyq halal ındýstrııasynyń damýy men órkendeýi, halal standarttaý jáne sertıfıkattaý salasynyń jandanýy úshin jasalyp jatqan mańyzdy qadam ekenin jetkizdi.
