QMDB: Keńeıtilgen tóralqa májilisi bastaldy (FOTO)
Elordada Qazaqstan musylmandary dinı basqarmasynyń keńeıtilgen Tóralqa májilisi bastaldy.
Bas múftı Naýryzbaı qajy Taǵanulynyń tóraǵalyǵymen ótip jatqan 2021 jyldyń qorytyndy jıynyna naıb múftıler, Dinı basqarmanyń bólim basshylary men mamandary, sondaı-aq 19 ókildiktiń bas ımamdary qatysyp otyr.
Qasıetti Quran Kárim aıattaryn oqýmen bastalǵan jıynda QMDB Tóraǵasy, Bas múftı Naýryzbaı qajy Taǵanuly: «Allaǵa shúkir, biz osy jyldy jaqsy nátıjelermen qorytyndylap otyrmyz. Osy jyly elimiz boıynsha 22 qaıyrymdylyq mekemesin ashtyq. Bir jylda 68 meshit jamaǵattyń ıgiligine berildi. Dinı basqarma Táýelsizdigimizdiń 30 jyldyq mereıtoıyna oraı elimiz boıynsha 30 myń túp aǵash otyrǵyzdy. Sonymen qatar Dinı basqarmanyń tól telearnasy – «Munara TV» arnasy ashylyp, durys dinı aqparat taratýǵa úles qosýda.
Mysyr, Túrkııa, Ózbekstan men Qyrǵyzstanǵa jasaǵan resmı saparymyz jemisti boldy. Atalǵan elderdiń Bas múftılerimen ekijaqty yntymaqtastyqty arttyrýǵa arnalǵan ortaq memorandýmdar qabyldadyq. Sonyń nátıjesinde qazaqstandyq shákirtterge bólinetin grant sany artty.
Ózderińiz kýá bolǵandaı, búginde Qazaqstan musylmandary dinı basqarmasy bilim men ǵylym, dinı aǵartýshylyq baǵyttaǵy jumystarǵa basymdyq berip, «Tolyq adam», «Pátýalar jınaǵy», «Ihsan – rýhanı tárbıe negizi» syndy qoǵam úshin mańyzdy bolǵan taqyryptarda birneshe kitap shyǵardyq. Bul baǵyttaǵy jumystar áli de jalǵasyn tabady» dedi.
Aıta keteıik, búgin keńeıtilgen Tóralqa májilisinde oblys bas ımamdary men bólim basshylarynyń jeti baǵyt boıynsha 2021 jyly atqarǵan jumystarynyń esebi tyńdalady. Sonymen qatar jemisti qyzmet istep, jumystyń jeti baǵyty boıynsha úzdik nátıje kórsetken ımamdar, din qyzmetkerleri arnaıy gramotamen marapattalady.
