QMDB: Májiliste birqatar másele qaraldy (FOTO)
Búgin Bas múftı Naýryzbaı qajy Taǵanulynyń tóraǵalyǵymen kezekti QMDB Apparat jınalysy ótti. Jınalysqa naıb múftı Ershat qajy Aǵybaıuly, Apparat basshysy Ǵylymbek Jádigeruly, Bas múftı keńesshileri men bólim meńgerýshileri qatysty.
Májilistiń kún tártibinde birneshe másele qaraldy. Atap aıtqanda, «Bólim saǵaty» jobasy aıasynda ár apta saıyn salalyq bólimderdiń jumysy men josparyn talqylaý, múftııattyń tól basylymdary – «Munara» gazeti men «Iman» jýrnaldaryna shyǵatyn materıaldardyń mazmunyn arttyrý, «Pátýlar jınaǵy» kitabynyń kezekti nusqasyn shyǵarý, dinı rásimderge qatysty suraq-jaýaptar jazylǵan arnaıy kitap shyǵarý, Respýblıkalyq aqparattyq-nasıhat tobynyń jumysyn jandandyrý, oblys ortalyqtarynda halal azyq-túlikterdiń arnaıy aptalyǵyn uıymdastyrý, QMDB janynan qurylǵan «Talaba» jastar uıymynyń jumysyn júıeleý, Nur-Múbárak ýnıversıteti men medrese-kolledj stýdentterin qyzmetke bólý, t.b. máseleler jan-jaqty talqylandy.
Din qyzmetkerlerin jumysty jańa qarqynmen isteýge úndegen Naýryzbaı qajy Taǵanuly: «Biz jaýapkershilik júktelgen jańa zamanda ómir súrip otyrmyz. Sondyqtan ár qyzmetker ózine tıesili mindetterdi muqııat oryndaýy tıis. Árkim ózin, óz salasyn damytýdy oılastyryp, jan-jaqty izdenýi kerek. Til oqyp, trenıngke qatysam deýshiler bolsa, olarǵa qarjylaı kómek kórsetýge de daıynbyz», – dep atap ótti.
Májilis sońynda Bas múftı QMDB qyzmetkerlerine naqty tapsyrmalar berdi.
