QMDB men Túrkııa din isteri basqarmasy ózara yntymaqtastyq týraly memorandým qabyldandy (FOTO)
Búgin Qazaqstan musylmandary dinı basqarmasy men Túrkııa Din isteri basqarmasy Ankara qalasynda ózara yntymaqtastyq týraly Memorandým qabyldady.
Bas múftı Naýryzbaı qajy Taǵanulynyń Túrkııaǵa jasaǵan resmı sapary barysynda Túrkııa Din Isteri basqarmasynyń basshysy Álı Erbashpen birge din salasyndaǵy kópjaqty yntymaqtastyqty ornatýǵa arnalǵan qujatqa qol qoıdy.
Memorandým Qazaqstan men Túrkııa arasyndaǵy dostyq qarym-qatynasty odan ári nyǵaıtýdy, eki elge ortaq dinı mektepti jańǵyrtýdy, mádenı-rýhanı baılanysty arttyrýdy, tájirıbe almasýdy, ǵylymı jobalardy júzege asyrýdy, din qyzmetkerleriniń biliktiligin kóterýdi kózdeıdi.
Memorandým negizinde Taraptar bir-birine halyqaralyq deńgeıde ózara kómek pen qoldaý kórsetýge mindetteledi. Yntymaqtastyq sheńberinde eki eldiń bolashaq urpaǵyna patrıotızm men beıbitshilik qundylyqtary nasıhattalyp, Islamnyń rýhanı baǵa jetpes murasy men mádenıeti dáripteledi.
Atalǵan yntymaqtastyq aıasynda dinı merekeler kezinde birlesken sharalar uıymdastyrý, ózekti máseleler boıynsha ortaq pikirge uıysý, tarıhı-mádenı qundylyqtarǵa qııanat jasaýǵa jol bermeý, qoǵamda shynaıy dinı aqparattyń taralýyn jáne kún tártibindegi dinı máselelerdi sheshý úshin ártúrli is-sharalar (konferentsııa, semınar, kezdesý t.b.) uıymdastyrýǵa negizdeledi.
Sonymen qatar azamattardyń eki el aýmaǵynda ornalasqan tarıhı qasıetti jerlerge zııarat etýi qamtamasyz etiledi.
Eske salaıyq, atalǵan kelisim QMDB Tóraǵasy, Bas múftı Naýryzbaı qajy Taǵanulynyń Túrkııa Respýblıkasyna resmı sapary aıasynda jasaldy.
