QMDB-NYŃ 2026-2028 JYLDARǴA ARNALǴAN TsIFRLYQ DAMÝ TUJYRYMDAMASY ÁZIRLENEDI
Bul týraly Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly 2026 jylǵa arnalǵan Baǵdarlyq baıandamasynda málimdedi.
Bas múftı eldegi tsıfrlyq jańǵyrý úderisi men jasandy ıntellekt múmkindikterin eskere otyryp, dinı qyzmetti aqparattyq keńistiktiń talaptaryna saı jetildirý qajettigin atap ótti.
«Ózderińizge málim, jýyrda Memleket basshysy qadirli Qasym-Jomart Kemeluly 2026 jyldy Tsıfrlandyrý jáne jasandy ıntellekt jyly dep jarııalaý týraly Jarlyqqa qol qoıdy. Prezıdentimiz jasandy ıntellektini damytý máseleleri jóninde keńeste aldaǵy jyldar ishinde Qazaqstan tsıfrlyq memleketke aınalýy kerek ekenin aıryqsha atap ótti. Atalǵan keńeste Memleket basshysy: «Bul – aıqyn ári ózgermeıtin maqsat. Sebebi biz jasandy ıntellektiniń múmkindikterin tolyq paıdalanatyn el bolýymyz qajet» dedi.
Qazir tehnologııa men bilimniń, aqparat pen tsıfrlyq múmkindikterdiń zamany. Osy úderisten qalys qalý – ýaqyt talabyna jaýap bere almaý degen sóz.
Osynaý úlken jaýapkershilikti sezinip, tsıfrlandyrý baǵytynda birqatar aýqymdy ári júıeli jobalardy júzege asyryp kelemiz. Munyń barlyǵy din qyzmetkerleriniń jumysyn jeńildetýge, halyqqa kórsetiletin qyzmettiń sapasyn arttyrýǵa jáne dinı aqparattyń qoljetimdi bolýyna oń áser etýde. Alaıda búgingi jetken nátıjemen toqtap qalýǵa bolmaıdy. Aldaǵy kezeńde tsıfrlyq tehnologııalar men jasandy ıntellekt múmkindikterin dinı salada júıeli ári sharıǵat talaptaryna saı keńinen qoldaný – ortaq mindetimiz.
Osyǵan baılanysty Qazaqstan musylmandary dinı basqarmasynyń 2026-2028 jyldarǵa arnalǵan Tsıfrlyq damý tujyrymdamasyn ázirleý qajet dep sanaımyn. Bul qujat múftııattyń aldaǵy úsh jyldaǵy tsıfrlyq damý baǵytyn aıqyndap, naqty maqsat-mindetterdi, basym baǵyttardy belgileıtin mańyzdy strategııalyq negiz bolýǵa tıis», – dedi Bas múftı.
