QMDB ókildikterindegi is basqarýshylardyń jıyny ótti (FOTO)

Búgin Astana qalasyndaǵy respýblıkalyq «Áziret Sultan» meshitinde Birinshi naıb múftı Naýryzbaı qajy Taǵanulynyń tóraǵalyǵymen QMDB ókildikterindegi is basqarýshylardyń jalpy jıyny bolyp ótti. Óńirlerdegi ortalyq meshitterdiń is basqarýshy qyzmetine jaýapty mamandardyń basyn qosqan alqaly jıynǵa naıb múftı Baýyrjan Esmahan, QMDB Apparat jetekshisi Ǵılymbek Májıev, QMDB Is basqarýshysy Erbosyn Bektursynuly qatysyp, birqatar ózekti máselelr boıynsha keleli keńes ótkizdi.

Kún tártibindegi birneshe másele boıynsha ortaq oı qorytyp, meshitterdegi qarjylyq ashyqtyqty aıqyndap, is basqarýshylardyń jumys mindetteri naqtylandy. Sondaı-aq, qulshylyq ordalaryndaǵy kiris-shyǵys esepteri men meshit múlikterine qatysty qujattardy birizdilikke keltirý jumysynyń da jaı-japsary keńinen qozǵaldy.

Jınalys aıasynda QMDB tóraǵasy, Bas múftı Serikbaı qajy Orazdyń Tóralqa jınalysynda bekitken tapsyrmasyna sáıkes meshit is basqarýshylarynyń alty aı saıyn jamaǵat aldynda esep berý jumysy qaraldy. Almaty qalasynyń is basqarýshysy Erjan Nazarbek alǵashqy synaq retinde júrgizilgen esep berý jumysy jaıly baıandama jasap, ózge ókildikterdegi áriptesterimen tájirıbe bólisti.

Sondaı-aq, mýtáýállı (is basqarýshy) qyzmetiniń maqsaty men mindetteri qaralyp, kópshilik talqysynan ótken qorytyndy usynys Bas múftı Serikbaı qajy Orazdyń bekitýine usynyldy.