QMDB: Pátýa máselesine arnalǵan alqaly jıyn ótti (FOTO)

Búgin Elordada naıb múftı Ershat Aǵybaıulynyń tóraǵalyǵymen pátýa jáne sharıǵat máselelerine arnalǵan arnaıy jıyn ótti. Basqosýǵa QMDB Apparat basshysy Ǵylymbek Májıev, bólim basshylary, Salttyq qyzmet kórsetý bıýrosynyń ókili Nurbolat Shaıhıslamuly, Nur-Sultan qalasynyń ımamdary qatysty. 

Alqaly jıyndy ashqan naıb múftı Ershat Aǵybaıuly musylman zıratynyń ádepteri men talaptaryn qalyptastyrýdyń mańyzdylyǵyn baıandady. QMDB Apparat basshysy Ǵylymbek Májıev dinı rásimderdi atqarý isinde múftııattyń jumysyna aıryqsha toqtaldy.

Pikir almasý formatynda ótken kezdesýde ımamdar zıratty aralaý mádenıeti, jerleý rásimderi, as berý sharalary kezindegi ysyrap, as mázirin bekitýdiń qajettiligi, janaza namazyn meshitte oqýdyń artyqshylyǵy týraly óz oılaryn ortaǵa salyp, naqty usynystar bildirdi.

Kezdesý sońynda QMDB tóraǵasy Serikbaı qajy Orazdyń bastamasymen shyqqan «Janaza jáne jerleý rásimderi» atty kitapta kórsetilgen qaǵıdalar men pátýalardy halyqqa nasıhattaý qajettigi sóz bolyp, ortaq uıǵarym jasaldy.