QMDB: Qajylyqqa qatysty alqaly jıyn ótti (FOTO)

Búgin Elordada QMDB Bas keńsesinde bıylǵy qajylyqqa daıarlyq jumystary pysyqtaldy. Kún tártibindegi másele boıynsha, qajylyq maýsymy kezinde ýaǵyz-nasıhat jumystaryna jaýapty ımamdardyń bilimi men tájirıbesin shyńdaý barysy sóz boldy.

Alqaly jıynda alǵashqy sóz alǵan QMDB Apparat basshysy Ǵylymbek Májıev qajylyq mádenıetin qalyptastyrý qajettigin atap ótti.

«Halqymyz «qajy» degen atty qurmettep, qajylyqqa barǵan azamattardy ardaqtap, olarǵa iltıpat kórsetken. Biz óz kezegimizde qajylyq sapary kezinde ýaǵyz-nasıhat jumystary men qyzmet kórsetý sapasyn arttyrýǵa kúsh salýymyz qajet», – dedi Ǵylymbek Jádigeruly.

Elimizdiń barlyq aımaǵynan kelgen bilikti ustazdar men meshit ımamdary qajylyqqa qatysty emtıhan suraqtarynan ótti. Degenmen, sarapshylardyń irikteýinen keıin tolyq tizim belgili bolady. Birneshe jyl boıy Qazaqstan Qajylyq mıssııasynyń sharıǵat jáne pátýa bólimine jetekshilik etken belgili ustaz, ǵalym Baýyrjan Álıuly din qyzmetkerleri tek ýaǵyz aıtýmen shektelmeı, qajylyqtyń úkimderi men rúkinderin jetik bilýi tıis ekenin aıryqsha atap ótti. Óıtkeni, ulyq saparda suraq qoıyp, pátýa suraıtyndardyń qatary kóbeıedi.

Jıyn barysynda din qyzmetkerlerine Dinı basqarma shyǵarǵan «Qajylyq jáne umra úkimderi» kitaby úlestirildi.

Basqosý sońynda jumys toby QMDB bekitken arnaıy qujatty bekitti. Endi qasıetti mekenge sapar shegetinder osy erejege saı jumys isteıtin bolady.