QMDB QYZMETKERLERI MINISTRLIK TARAPYNAN MARAPATTALDY (FOTO)

Búgin Astana qalasynda QMDB Tóraǵasy, Bas múftı Naýryzbaı qajy Taǵanulynyń jetekshiligimen ótip jatqan 2025 jyldy qorytyndylaýǵa arnalǵan Tóralqa májilisinde Qazaqstan musylmandary dinı basqarmasynyń 35-jyldyǵyna oraı birqatar múftııat qyzmetkerleri el rýhanııatyn damytýǵa, din salasyndaǵy turaqtylyq pen qoǵamdyq kelisimdi nyǵaıtýǵa qosqan úlesi úshin memlekettik marapattarǵa ıe boldy.

QR Premer-Mınıstriniń orynbasary – Mádenıet jáne aqparat mınıstri Aıda Ǵalymqyzy Balaeva atynan QMDB Tóraǵasynyń orynbasarlary, naıb múftıler Sansyzbaı Qurbanuly men Kenjetaı Baıkemelulyna «Qurmet gramotasy» tabystaldy.

Sondaı-aq, QMDB Tóraǵasynyń orynbasary, naıb múftı Ermek Qasbolatulyna, Bas múftı keńesshisi Bıjigit Nurjigitulyna, QMDB Apparat basshysy Ǵylymbek Jádigerulyna, sondaı-aq Dinı bilim jáne kadr daıyndaý, Dinı saraptama, Meshit isteri, Is basqarý bólimderiniń jaýapty qyzmetkerlerine Mádenıet jáne aqparat mınıstri atynan «Alǵys hat» tabystaldy.

Budan bólek, Qazaqstan Respýblıkasy Mádenıet jáne aqparat mınıstrligi Din isteri komıtetiniń tóraǵasy Ánýar Nurmanuly Hatıev atynan QMDB-nyń Qajylyq, Tsıfrlyq damý, Aqparat jáne qoǵammen baılanys, Zeket jáne qaıyrymdylyq, Áıelder-qyzdar sektory jáne ózge de qurylymdyq bólimderiniń birqatar basshylary men orynbasarlary «Alǵys hatpen» marapattaldy.

Atalǵan marapattar – QMDB ujymynyń din salasyndaǵy júıeli eńbegine, áleýmettik jobalardy júzege asyrýdaǵy belsendiligine jáne qoǵammen baılanystaǵy nátıjeli jumysyna berilgen joǵary baǵa.

Qazaqstan musylmandary dinı basqarmasy kórsetilgen senim men qurmet úshin alǵys bildirip, el birligi men rýhanı tutastyq jolyndaǵy qyzmetin jalǵastyra bermek.