QMDB: RAMAZAN AIYNA ORAI TÓRALQA MÁJILISI ÓTTI (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen Ramazan aıyna oraı Qazaqstan musylmandary dinı basqarmasynyń Tóralqa májilisi ótti.
Alda kele jatqan Ramazan aıyna daıyndyqty pysyqtaý maqsatynda ótken májiliske naıb múftıler, Bas múftı keńesshileri, bólim basshylary jáne oblys bas ımamdary qatysty.
Jıynda QMDB Tóraǵasy Naýryzbaı qajy Taǵanuly arnaıy baıandama jasap, ulyq aıda atqaratyn jumystardy júıelep, tyńǵylyqty daıyndyq jasap, orazanyń qadir-qasıetin jamaǵatqa kóbirek nasıhattaýǵa shaqyrdy.
«Ramazan – Alla Taǵalanyń musylmandarǵa bergen uly syıy, nyǵmeti. Ardaqty Paıǵambarymyz Muhammed (oǵan Allanyń salaýaty men sálemi bolsyn) óz úmbetin: «Bul aıda jánnat esikteri ashylady. Oraza tutqan adamnyń aldyńǵy jáne keıingi kúnálary keshiriledi», – dep súıinshilegen. Biz, Ramazanda Haqqa da, halyqqa da qyzmet etemiz.
Ramazan aıynda adamdarǵa kóp jaqsylyqtar jáne múmkindikter beriledi. Bul – shynaıy qulshylyq jasap, Allanyń razylyǵyn alýǵa, sonymen qatar halqymyzǵa qyzmet etip, adamdardyń alǵysyn alýǵa berilgen úlken múmkindik maýsymy! Sondyqtan ózimizge berilgen mindetter men jaýapkershilikti janashyrlyqpen, yqylaspen, ıhsanmen oryndaýymyz kerek. Qasıetti aıda Allanyń razylyǵy men halyqtyń alǵysyn alý barshamyzǵa násip bolsyn. Osy jolda Alla bárimizge kúsh-qýat, rýhanı birlik bersin!» dedi Bas múftı.
Budan keıin naıb múftı, Sharıǵat jáne pátýa bóliminiń meńgerýshisi Sansyzbaı Qurbanuly pitir sadaqasy, zeket, pidııanyń bıylǵy mólsheri, Dinı bilim jáne kadr daıyndaý bóliminiń meńgerýshisi Smaıyl Seıtbekov Quran hatym oqý toptaryn bekitý, qarılardy meshitterge bólý, taraýyq namazyn ótkizý, Ýaǵyz-nasıhat bóliminiń meńgerýshisi Batyrjan Mansurov Ramazan aıynda dárister, ýaǵyz-nasıhattardy kóbirek uıymdastyrý, Aqparat bóliminiń meńgerýshisi Aǵabek Qonarbaıuly orazada oryndalatyn medıa jospar, «Zeket jáne qaıyrymdylyq» qorynyń dırektory Maqsat Qaıyrǵalıev qaıyrymdylyq is-sharalary jaıly baıandama jasady. Apparat basshysy Ǵylymbek Jádigeruly Ramazan aıynda atqarylatyn jalpy jumystardy tanystyrdy.
