QMDB: Ramazan aıynda 1 015 610 adamǵa kómek berildi (FOTO)
Qazaqstan musylmandary dinı basqarmasynyń «Zeket jáne qaıyrymdylyq» qory Ramazan aıynda jomart jandardyń demeýimen birqatar is-shara atqaryp, eldiń alǵysyna bólendi.
Atap aıtqanda, elimizde qordyń aýqymdy jobalarynyń biri «El úlesi – páterge» qaıyrymdylyq aktsııasy boıynsha 15 muqtaj otbasyǵa 15 úıdiń kilti berildi. Naýqas jandardy, ásirese aýyr syrqatqa shaldyqqan sábılerdi qoldaý maqsatynda «Ómirge úmit syıla» jáne «Úmit syıla sábıge» aktsııalary aıasynda ótinish bildirgen 2 102 adamnyń emine kómek kórsetildi. Odan bólek áleýmettik jelilerde jarııalanǵan bir kózin zaqymdap alǵan 9 jasar Dıananyń ótinishi eskerilip, oǵan Túrkııa memleketinde ota jasaýǵa qarjylaı kómek berildi. Sonymen birge Múmkindigi shekteýli 11 balaǵa qoldanysyna qajetti zattar alyp berilse, Zaǵıptar qoǵamynyń ótinishi boıynsha «shoýdaýn» tennıs ústeline kómek kórsetildi.
«Zeket jáne qaıyrymdylyq» qory Ramazan aıynda din salasynda bilim alyp jatqan shákirtterdi de qýantty. Máselen «Meshit pen medreselerge kómek» jobasy aıasynda 272 meshit-medrsege jáne din salasynda oqyp jatqan shákirtterge demeýshilerdiń qoldaýymen kómek jasaldy. Sondaı-aq «QMDB granty» aktsııasy boıynsha Nur-Múbarak ýnıversıtetinde oqyp jatqan 7 shákirttiń jyldyq oqý aqysy tólendi. Jalpy QMDB ókildikteriniń qoldaýymen 30 shákirttiń oqý aqysyn tóleý josparlanýda deıdi qor mamandary.
«Taıqazan» jáne «Qaıyrymdy juma» jobalary aıasynda demeýshilerdiń qoldaýymen 74 867 otbasyǵa azyq-túlikpen kómek kórsetilse, «Aýyzashar sebeti» aktsııasy aıasynda 30 kún boıy 920 133 adamǵa aýyzashar sebetteri taratyldy. Meshitter janyndaǵy qaıyrymdylyq dúkenderi arqyly 1788 otbasyǵa kıim-keshek taratyldy.
«Qıyndyqta el birge» jobasymen bıyl sý basqan Batys Qazaqstan oblysy Qaratóbe aýdanyna qarasty Shalǵyn aýylynyń turǵyndaryna kórpe-tósenishterin alyp berilse, Jánibek aýdanyna qarasty Jaqsybaı aýylyna azyq-túlik, kıim-keshek jáne kúndelikti turmysqa qajet zattar jóneltildi.
Qordyń biregeı jobalarynyń biri «Jylýlyq syıla» aktsııasy boıynsha 3946 otbasyǵa kommýnaldyq qyzmet tólemderine kómek kórsetilse, 902 otbasyǵa iri kólemde et taratyldy. Sondaı-aq «Kóshpeli qaıyrymdylyq kerýeni» qaıyrymdylyq jobasy 3101 otbasyǵa qarjylaı jáne kıim-keshek túrinde kómek kórsetildi.
Ata-ana qamqorlyǵynan aıyrylyp, taǵdyr taýqymetin erte tartqan balalardy qoldaý maqsatynda «Jetim kórseń, jebeı júr» jobasy aıasynda 4035 jetim balaǵa ártúrli kómek berildi. Al «Analarǵa tosyn syı» jobasy aıasynda 419 anaǵa tosyn syı berildi.
«Zeket jáne qaıyrymdylyq» qory mamandardyń biliktiligin arttyrý men qor jumysyn damytý maqsatynda arnaıy is-sharalardy qolǵa aldy. Máselen Ramazan aıynda zeket ókilderi jáne meshit qyzmetkerlerine 4 oqý-ádistemelik, praktıkalyq semınar ótkizilse, zeket pen qaıyrymdylyq týraly 25 beıne rolık túsirilip, baspasóz quraldary men áleýmettik jelilerde 30-ǵa jýyq suhbat berildi.
Qoryta kelgende «Zeket jáne qaıyrymdylyq» qory jáne ókildikterdiń uıymdastyrýymen Ramazan aıynda 6 476 qaıyrymdylyq is-sharasy atqarylsa, «Qoldan – qolǵa» jobasy aıasynda 4 865 adamǵa qarjylaı zeket berildi. Barlyq joba boıynsha túıindeı kelgende, bir aıda 1 015 610 adamǵa qaıyrymdylyq kómek kórsetildi.
Источник: Aidos
