QMDB: Respýblıkalyq jastar forýmy ótedi

Qazaqstan musylmandary dinı basqarmasynyń Jastar isi sektory «Islam – yntymaq pen birlik dini» jyly aıasynda 15 naýryz kúni «Jalyndy jastar yntymaǵy» atty respýblıkalyq jastar forýmyn ótkizedi.

Forýmnyń maqsaty – elimizdegi jastardyń yntymaǵyn arttyryp, jańa Qazaqstannyń irgetasyn qalaýǵa óz úlesin qosý. Sonymen birge jastardyń yntymaǵyn arttyrýǵa yqpal etetin kommýnıkatsııalyq orta qurý, jastardyń ózin-ózi tanytýyna yqpal etý, olardyń quzyrettiligi men daǵdylarynyń deńgeıin arttyrý, jastardyń boıynda patrıottyq qundylyqtar men ınnovatsııalyq oılaý daǵdylaryn qalyptastyrý, adamı kapıtaldy arttyrý.

Forým jumysyna QMDB Tóraǵasy, Bas múftı Naýryzbaı qajy Taǵanuly, Aqparat jáne qoǵamdyq damý mınıstrliginiń Jastar jáne otbasy isteri komıtetiniń tóraǵasy Shahmardan Baımanov, «AMANAT» partııasy janyndaǵy Jastar qanatynyń jetekshisi Nurjan Jetpisbaev, «Qazaqstan team» jastar uıymynyń basshysy Oljas Súleımenov, abaıtanýshy, «4 Damý» jobasynyń avtory Ernat Melsuly, IT mamany, bloger Tımýr Bektur, «Qsport» jobasynyń jetekshisi, kásibı jattyqtyrýshy Jandos Abýmýtalıfuly jáne Jastar isi sektorynyń ár óńirdegi ókilderi, erikti jastar qatysady. 

Sondaı-aq, forým aıasynda 200-ge jýyq qonaqtyń qatysýymen offlaın formatta semınar-trenıng ótedi. Jastardyń dáriskerlerge kókeıde júrgen suraqtaryn qoıyp, jaýap alýyna múmkindik bar.