QMDB «Talaba» qaýymdastyǵy Túrkııadaǵy shákirtter arasynda baıqaý jarııalady

Qazaq halqynyń uly oıshyly Abaı Qunanbaıulynyń 175 jyldyq mereıtoıy aıasynda elimizdiń túkpir-túkpirinde túrli sharalar uıymdastyrylyp, danyshpan aqynnyń mol murasy keńinen nasıhattalý ústinde. QMDB tóraǵasy, Bas múftı Naýryzbaı qajy Taǵanulynyń bastamasymen bul ıgi dástúr óńirdegi ókildikter arasynda da qoldaý taýyp, qazirgi tańda túrli baıqaýlar men saıystar ótkizilip keledi.

Osy oraıda Qazaqstan musylmandary dinı basqarmasynyń janynan qurylǵan Túrkııa elindegi «Talaba» qaýymdastyǵy da ıgi bastamaǵa ózindik ún qosyp, «Abaı jáne búgingi zaman» atty shyǵarmashylyq baıqaý jarııalap otyr. Túrik elinde ártúrli mamandyq boıynsha bilim alyp jatqan Qazaqstan azamattarynyń arasynda uıymdastyrylyp otyrǵan shyǵarmashylyq saıys Abaı murasyn dáriptep, sheteldegi qandastarymyzǵa qazaq halqynyń rýhanııatyn tanytýǵa baǵyttalǵan.

Saıys sharty boıynsha Túrkııa memleketinde ártúrli mamandyq boıynsha oqyp jatqan lıtseı, medrese, ýnıversıtet (daıyndyq kýrsy, bakalavr, magıstr jáne doktorlyq), akademııa jáne t.b. oqý oryndarynyń shákirtteri «Abaı jáne búgingi zaman» taqyrybyndaǵy maqalalary synǵa túspek. Sondaı-aq, qatysýshylardyń Abaıdyń óleńderi men qara sózderin jatqa jáne mánerlep oqý boıynsha saıysqa túsýge múmkindigi bar. Eki atalym boıynsha da jeke júldeler tigilgen. 

Kúlli álem halqyn dúrbeleńge salǵan indetke qarsy kúres sharalarynyń kúsheıtilýine oraı shyǵarmashylyq baıqaýdyń qabyldaý merzimi 10-sáýirge deıin uzartylǵan. Saıystyń tolyq sharttaryn Feısbýk jelisindegi «QMDB Talaba qaýymdastyǵy» paraqshasynan bilýge bolady.