QMDB: Táýlik boıy jumys isteıtin dinı aqparat ortalyǵy (Call Center) ashyldy (FOTO)

27 naýryz 2020 4512 0
Оqý rejımi

Búgin Nur-Sultan qalasynda Bas múftı Naýryzbaı qajy Taǵanulynyń bastamasymen Qazaqstan musylmandary dinı basqarmasynyń Ortalyq apparaty janynan Dinı aqparat ortalyǵy (call-center) ashyldy.

Aqparat ortalyǵynyń (call-center) nómiri – 33-30-30. Ortalyqqa Nur-Sultan qalasynyń kody arqyly telefon shalýǵa bolady. Ortalyqta din salasynyń bilikti mamandary táýlik boıy qazaq jáne orys tilindegi suraqtarǵa jaýap beredi.

Dinı aqparat ortalyǵyna (call-center) bir táýlikte shamamen 50-60 suraq túsedi. Budan bólek WhatsApp jelisi arqyly saýal qoıýshylar da bar. Statıstıkalyq málimet boıynsha, búginde saýal qoıýshylardyń basym bóligi juqpaly indetten saqtanýdyń joldary, oqylatyn arnaıy duǵalar, juma namazyna qatysty úkimder, t.b. týraly bilgisi keledi.  

«Prezıdentimiz Qasym-Jomart Toqaevtyń halyq únine qulaq asatyn memleket qalyptastyrý ıgi jobasy aıasynda elimizde izgi is-sharalar qolǵa alynýda. Qazaqstan musylmandary dinı basqarmasynyń negizgi jumys baǵyttarynyń biri – jamaǵat tarapynan qoıylǵan dinı suraqtarǵa jaýap berip, ózekti máseleler boıynsha pátýa shyǵarý. Qazir biz elimizdegi tótenshe jaǵdaı kezinde halyqqa úmit shýaǵyn shashyp, olardy jigerlendiretin, ımanyn kúsheıtip, qulshylyǵyn arttyratyn nasıhatty kóbirek aıtýymyz kerek. Osy baǵytta júzege asyp jatqan onlaın dárister men ýaǵyz-nasıhat jumystaryn toqtatpaýymyz tıis» dep atap ótti Bas múftı Naýryzbaı qajy Taǵanuly.

Dinı ortalyqtyń ashylý rásiminde Bas múftı elimizdiń ár aımaǵynan túsken saýaldarǵa jaýap berdi.    

Aıta ketsek, call-center osyǵan deıin respýblıkalyq «Áziret Sultan» meshiti janynan ashylǵan bolatyn. Qazaqstan musylmandary dinı basqarmasynyń áleýeti men Sharıǵat jáne pátýa bólimi qyzmetkerleriniń bilimi men tájirıbesi eskerilip, sall-center qyzmeti múftııattyń bas ǵımaratyna kóshirildi.    

 

Pіkіrler Kіrý