QMDB TÓRAǴASY ÁL-AZHAR ShEIHYMEN KEZDESTI (FOTO)
Búgin elordadaǵy «Áziret Sultan» meshitinde Qazaqstan musylmandary dinı basqarmasynyń tóraǵasy Naýryzbaı qajy Taǵanuly musylman áleminiń áıgili din ǵulamalary ilim alǵan, talaı dindarlar túlep ushqan, dástúrli Islamdy joǵary deńgeıde oqytatyn jańashyl ozyq oqý orny, máshhúr ál-Azhar ýnıversıtetiniń sheıhy, Joǵarǵy ımam Ahmet Taıyppen kezdesti.
Basqosý barysynda erteń elordada ótetin Álemdik jáne dástúrli dinder lıderleriniń VII seziniń álem jurtshylyǵyn birlik pen dostyqqa úndeýdegi róli jaıly aıtyldy.
Sonymen qatar Qazaqstan men Mysyr Arab Respýblıkasynyń din salasyndaǵy baılanysy, oqý-aǵartý baǵyty boıynsha áriptestik qarym-qatynastary sóz boldy.
Qalyptasqan ekijaqty kelisimderdi jandandyryp, ony júıeli júzege asyrý máselesi de talqylandy. Bas múftı Naýryzbaı qajy Taǵanuly Mysyrda bilim alyp jatqan qazaqstandyq ımamdarǵa, sonymen qatar elimizdegi Nur-Múbarak ýnıversıtetiniń dinı kadr daıarlaý baǵyty boıynsha qyzmetine qoldaý kórsetip kele jatqan ál-Azhar sheıhyna aıryqsha alǵys bildirdi.
