QMDB tóraǵasy Almatyda qaıyrymdylyq sharasyna qatysty (FOTO)
QMDB Tóraǵasy, Bas múftı Naýryzbaı qajy Taǵanuly Almaty ortalyq meshitinde ótken «Kúshimiz – birlikte» qaıyrymdylyq sharasyna qatysty.
Qaıyrymdylyq aktsııa aıasynda muqtaj 1000 otbasyǵa kómek kórsetildi. Ár otbasyǵa 25 keliden qajetti azyq-túlik salynǵan 25 tonna qorapty ımamdar men eriktiler taratty.
«Qıyn sátte birligimizdi kórsetý úshin jumylyp, qaıyrymdylyq sharasyn uıymdastyryp otyrmyz. Qazirgi sátte árqaısymyzǵa qoldaý qajet. Dinı basqarmanyń jumys baǵytynyń biri – qaıyrymdylyq kórsetý. Jýyrda Memleket basshysy Qasym-Jomart Toqaevtyń bastamasymen «Qazaqstan halqyna» qoǵamdyq áleýmettik qory quryldy. Din qyzmetkerleri de qoldaý kórsetýdi bastady. Osy rette sabyr men turaqtylyq bizdiń taban tireıtin tuǵyrymyz bolýy tıis. Bul qıyndyq ta óter, keter. Biraq bizdiń sabyrymyz, birligimiz, berekemiz ketpeýi kerek» degen Bas múftı eldi birlikke shaqyrdy.
Aıta keteıik, qaıyrymdylyq sharasy barysynda meshitke tirkelgen otbasylar kelip, Bas múftı qolynan qajetti azyq-túlik aldy. QMDB Tóraǵasy mundaı ıgi isterdiń jyl boıy jalǵasatynyn jetkizdi.
