QMDB tóraǵasy «Antikor» ortalyǵynda boldy (FOTO)
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Syr óńirine jasaǵan saparynda Qyzylorda qalasynda ornalasqan «ANTIKOR» ortalyǵyna at basyn burdy.
Ortalyqtyń jumysymen tanysqan soń Bas múftı qyzmetkerlerimen arnaıy kezdesip, nasıhat aıtty. Adaldyqty tý etken jandarǵa ıslam dinindegi otansúıgishtik pen amanatqa beriktiktiń, parasattylyq pen ádildiktiń alar orny jaıynda tilge tıek etti.
«Barlyq musylmandarǵa ádildigimen áıgili bolǵan halıfa Omar Hattabulynyń (r.a.) úlgi bolar isi jaıly bizge jetken ǵıbratty oqıǵa bar. Birde halıfa Omarǵa joldasy Ábdirahman keledi. Ol ýaqytta Omar memlekettiń jumysymen aınalysyp otyrǵan bolatyn. Dosynyń kelgenin kórgen halıfa aldyndaǵy maıshamdy óshirip, basqasyn jaǵady. Omardyń bul isine tańdanǵan Ábdirahman:
– Ýa, musylmandardyń basshysy, bir maıshamdy óshirip, ekinshisin jaqqanyń ne? – deıdi. Sonda Omar:
– Sen kelgen ýaqytta men memlekettik istermen aınalysyp otyrǵan edim jáne ol maısham qazynanyki bolatyn. Al senimen jeke sharýamyz jaıly áńgimelesemin. Bizdiń bul áńgimemiz úshin memleket tóleýge tıisti emes. Sondyqtan men ózimniń maıshamymdy jaqtym, – dep jaýap beredi.
Minekı, Otanǵa degen adaldyq, memlekettiń, halyqtyń aldyndaǵy jaýapkershilikti tereń sezinýdiń eń kórkem mysaly – osy» dedi QMDB Tóraǵasy.
Jıyn sońynda Bas múftı ortalyq mamandarynyń jemqorlyqtyń jolyn kesýdegi jaýapty qyzmetterine sáttilik tilep, el ıgiligi úshin atqarylar jumystarda meshit ımamdarynyń da árdaıym qoldaý bildirýge daıyn ekenin jetkizdi. Osylaısha Naýryzbaı qajy Taǵanulynyń Qyzylorda oblysyna jasaǵan resmı sapary qorytyndylandy.
