QMDB TÓRAǴASY BAǴDARLYQ BAIaNDAMADAǴY IS-ShARALARDYŃ ESEBIN TYŃDADY (FOTO)
Búgin elordada Bas múftı Naýryzbaı qajy Taǵanulynyń tóraǵalyǵymen QMDB Ortalyq apparatynyń jıyny ótti.
Aldymen QMDB Tóraǵasy Ortalyq apparat qyzmetkerlerin kóktemniń alǵashqy merekesi 1 naýryz – Alǵys aıtý kúnimen quttyqtap, eńbekterine jemis, otbasylaryna qut-bereke tiledi.
Budan keıin Apparat basshysy Ǵylymbek Májıev Bas múftıdiń baǵdarlyq baıandamasynda aıtylǵan bastamalarǵa sáıkes 76 tapsyrmanyń qańtar-aqpan aılarynda 7-ýi oryndalǵanyn habarlady. Solardyń qatarynda QMDB Tóraǵasynyń bastamasymen elimizdegi 9 medrese-kolledjdiń ustazdaryna qosymsha jalaqy jáne úzdik 200 stýdentke shákirtaqy berilýde, «Islam jáne izgi qoǵam» jyly aıasynda Jezqazǵan qalasynda «Ulytaý oblysynyń rýhanı damýy» respýblıkalyq konferetsııasy ótti, elordada «Zeket jáne qaıyrymdylyq» qory jumysynyń aýqymy men sapasyn kóterý maqsatynda «Zeket Hub» qaıyrymdylyq ortalyǵy ashylǵanyn erekshe ataı ketken jón.
«Baǵdarlyq baıandamamda qoǵamǵa paıdaly irgeli isterge uıytqy bolatynymyzdy erekshe atap óttim. Bul oraıda Dinı basqarma men el meshitteriniń jumysyn bes baǵytta júıelep, naqty jospar quryldy. Olardyń qatarynda jyl boıyna júzege asatyn aıryqsha jobalar da bar. Bastysy, elge paıdaly isimizdi odan ári damytyp otyrýǵa tıispiz» dedi Naýryzbaı qajy Taǵanuly.
Jıyn barysynda bólim meńgerýshileri baıandama jasap, atqarylyp jatqan jumystar jóninde esep berdi. Bas múftı din qyzmetkerlerine jumysty jetildire berýdi tapsyrdy.
