QMDB TÓRAǴASY BAS MEShITTE JAMAǴATQA DÁRIS ÓTKIZDI (FOTO)
QMDB Tóraǵasy, Bas múftı Naýryzbaı qajy Taǵanuly aqsham namazynan keıin Respýblıkalyq bas meshitte jamaǵat aldynda ýaǵyz aıtty.
Bas múftıdiń dárisi «Tápsirlerdiń tańdaýlysy» kitaby aıasynda ótip, Qurannyń Fatıha súresiniń ereksheligi men aýdarmasy túsindirildi.
«Mekkede túsken bul súrege «ál-Fatıha» (ashýshy), «Ýmmýl-kıtab» (kitaptyń anasy), «ás-Sábǵýl-másánı» (kóp qaıtalanatyn jeti aıat) degen esimder berilgen. Quran osy súremen bastalǵany úshin «ál-Fatıha» dep atalǵan. Bul - túsý turǵysynan bolmasa da tártip turǵysynan Qurannyń alǵashqy súresi. «Fatıha» Qurannyń barlyq maǵynasyn qamtıdy. Bul súrede senim, ǵıbadat, Allanyń kórkem sıpattary, tek qana Oǵan qulshylyq etý, járdem suraý, Allanyń ámirine baǵyný, tyıymdarynan saqtaný baıandalady. Sodan bolar «Fatıha» súresi qalǵan súrelerdiń máni, máıegi ispetti» deı kele Naýryzbaı qajy Taǵanuly Fatıha súresiniń maǵynasyna toqtalyp, aıattardyń tápsirin túsindirdi.
Aıta keteıik, Bas meshittegi ýaǵyz-nasıhat jumystary qyrkúıek aıynda bastalǵan bolatyn. Oǵan QMDB ustazdary qatysyp, «Paıǵambarlar tarıhy», «Alla Taǵalanyń kórkem esimderi», «Ihsan ilimi», «Hadıs taǵylymy», «Islam ǵıbadaty» jáne orys tilinde «Ozarennye serdtsa» taqyrybynda ýaǵyz-nasıhat aıtylýda. Dárister qazan aıynda da tolyq jalǵasady.
