QMDB tóraǵasy bıylǵy qurban shalýdyń ereksheligine toqtaldy
Búgin Ortalyq Kommýnıkatsııalar qyzmetinde ótken brıfıng barysynda Bas múftı Naýryzbaı qajy Taǵanuly bıylǵy qurban shalýdyń ereksheligine toqtaldy. Sonymen qatar, kelip túsken birneshe saýalǵa jaýap berdi. Qurban aıt merekesi Ǵulamalar Keńesiniń bekitýimen 31 shilde, 1-2 tamyz kúnderine sáıkes kelip tur. Pandemııa kezinde meshitterdiń jabyq bolýyna baılanysty 31 shilde kúni Qurban aıt namazy oqylmaıdy dep atap ótti Bas múftı.
«Dinı basqarma el musylmandarynyń ótinishin eskere otyryp bıylǵy jyly alǵash ret Qurban aıt qarsańynda halyqaralyq tájirıbege súıenip, qashyqtan qurban shalý jobasyn qolǵa aldy. Osy maqsatta qurban2020.kz saıtyn búgin tolyqtaı iske qostyq. Al qurbandyq shalýǵa onlaın tapsyrys 30 shildege deıin qabyldanady. Kez-kelgen azamat onlaın túrde qurban shalýǵa tapsyrys bere alady», – dedi Naýryzbaı qajy Taǵanuly.
Onlaın rejımde tapsyrys qabyldap, qurbandyq etin kómekke zárý jandarǵa taratý tájirıbesi Túrkııa, Malaızııa, Indonezııa, Birikken Arab Ámirlikteri syndy birqatar musylman memleketterinde burynnan qalyptasqan. Bul júıeniń basty ereksheligi Qurbandyq eti túgeldeı muqtaj azamattarǵa taratylady. Mundaı joba elimizde tuńǵysh ret qolǵa alynyp otyr.
«Dinı basqarmanyń maqsaty – azamattardyń qurbandyǵyn shalyp berýdi uıymdastyrý. Onlaın tapsyrys arqyly qurbandyq shalý kezinde úırenshikti bolǵan maldy ózimiz tańdaý, qasapshynyń janyna baryp ózimiz soıý sekildi jaǵdaı bolmaıyn dep tur. Bul jobany karantın kezinde qurban shalýǵa nıet etken azamattardyń tilegin júzege asyrýǵa múmkindik retinde usynyp otyrmyz. Taǵy bir eskeretin jaǵdaı osy kezge deıin Qurban shalǵan azamattar etti úshke bólip, bir bóligin aǵaıyn-týys, kórshi qolańǵa arnap aıttyq dastarhanyn jaıatyn. Pandemııa jaǵdaıyna baılanysty soıylǵan et bıyl túgeldeı áleýmettik az qamtylǵan jandarǵa, muqtaj otbasylarǵa úlestiriledi. Osy rette azamattarǵa aıtarym. pendeshilikke salynbaı, mal baǵasyn kóterip paıda tabýdy emes, saýapty iske atsalysaıyq», – dedi Bas múftı.
Brıfıng kezinde bul jobany kelesi jyly da jalǵastyrý josparda bar ekeni aıtyldy. Aıta ketýimiz kerek, onlaın qurbandyq shalý barysynda ımamdardyń jumysy deldaldyq emes, atalǵan rásimdi uıymdastyrý jáne qurban etterin muqtaj jandarǵa úlestirý.
Qazirgi ýaqytta memleket tarapynan qoldaý kórsetilip, ár oblysta qurban shalý orny ashylǵan. Dinı rásim jergilikti ákimdik pen sanıtarlyq-dáriger mamandardyń ruqsatymen, tártip saqshylarynyń qadaǵalaýymen karantın talaptaryn qatań túrde saqtaı otyryp oryndalady.
