QMDB tóraǵasy Dúnıejúzilik Islam lıgasynyń bas hatshysymen kezdesti (FOTO)
QMDB Tóraǵasy, Bas múftı Naýryzbaı qajy Taǵanuly Er-Rııad qalasynda Dúnıejúzilik Islam Lıgasynyń Bas hatshysy sheıh, doktor Muhammed ıbn Abdýlkarım ál-Issamen kezdesti.
Kezdesýde eki el arasyndaǵy dostyq, rýhanı baılanystar sóz boldy. Dúnıejúzilik Islam Lıgasynyń Bas hatshysy QMDB Tóraǵasyna «Din ustanýshylar arasyndaǵy ortaq qundylyqtar forýmyna» qatysyp, jasaǵan baıandamasy úshin alǵysyn bildirip, ortaq bastamalarǵa qoldaý kórsetýge daıyn ekenin aıtty.
«Qazaqstannyń biz úshin orny bólek. Sizdermen aradaǵy qalyptasqan dostyq baılanysty ári qaraı damytýǵa árqashan nıettimiz. Qazaqstan kóptegen elderge óziniń turaqtylyǵymen, dinaralyq kelisimdi saqtaýdaǵy ózindik úlgisimen tanymal. Biz árkez ortaq jobany birge atqarýǵa daıynbyz», – dedi Lıga Bas hatshysy.
Óz kezeginde Naýryzbaı qajy Taǵanuly mańyzdy jıynnyń nátıjeli bolǵanyn aıtyp, Lıganyń jumysyna tabys tiledi.
«Dúnıejúzilik Islam Lıgasy Qazaqstanda ótetin Álemdik jáne dástúrli dinder lıderleriniń Sezin, bizdiń ortaq bastamalarymyzdy árdaıym qoldap keledi. Ózińizdi qyrkúıek aıynda Qazaqstan astanasynda ótetin Álemdik jáne dástúrli dinder lıderleriniń VII Sezine qatysý úshin arnaıy shaqyramyz. Bizdiń maqsatymyz – táýelsizdik alǵan tustan beri beıbitshilikti ustaný, álemde bolyp jatqan janjal, dinaralyq qaqtyǵystardyń aldyn alý. Osy rette Lıganyń atqaryp otyrǵan jumysy orasan zor. Musylman úmbetiniń aýyzbirshiligin nyǵaıtý baǵytynda da kóptegen jumys atqarylýda. Bizdiń de maqsatymyz dinı kózqarastarymyz bir bolyp, ortaq múddege qaraı oıyssaq deımin. Ózińizben pikir almasyp, suhbattasqanyma qýanyshtymyn. Alla razy bolsyn! Lıganyń jumysyna bolashaqta da tabys tileımin!» – dedi Bas múftı.
Kezdesý sońynda Bas hatshy Qazaqstanǵa shaqyrýdy qabyl alǵanyn jetkizip, josparda bar ekenin aıtty. Eske salaıyq, sársenbi kúni Er Rııad qalasynda Dúnıejúzilik Islam lıgasynyń uıymdastyrýymen «Din ustanýshylar arasyndaǵy ortaq qundylyqtar» taqyrybynda konferentsııa ótken bolatyn.
