QMDB TÓRAǴASY II RESPÝBLIKALYQ «ÚZDIK IMAM» INTELLEKTÝALDY BILIM SAIYSYNYŃ JEŃIMPAZDARYN MARAPATTADY

Astana qalasyndaǵy «Áziret Sultan» meshitinde Qazaqstan musylmandary dinı basqarmasynyń uıymdastyrýymen ótken II respýblıkalyq «Úzdik ımam» ıntellektýaldy bilim saıysynyń saltanatty marapattaý rásimi ótti.

Marapattaý rásimine arnaıy qatysqan QMDB Tóraǵasy, Bas múftı Naýryzbaı qajy Taǵanuly saıystyń mańyzdylyǵyna toqtalyp, qatysýshylarǵa rızashylyǵyn bildirdi.

«Astana tórinde «Áziret Sultan» meshitinde bastalǵan «Úzdik ımam» II respýblıkalyq ıntellektýaldy bilim saıysynyń qorytyndy kezeńine de kelip jettik. Eń aldymen, saıysqa qatysqan barsha ımamdarǵa taǵy da rııasyz nıetpen rızashylyǵymdy bildiremin. Alla razy bolsyn!

Sizder bul dodaǵa tek jeńis úshin emes, bilimderińizdi shyńdaý, tájirıbe almasý, kásibı deńgeılerińizdi kóterý maqsatynda keldińizder dep oılaımyn. Sondyqtan búgingi jarystyń árbir qatysýshysy jeńimpaz atandy. Sebebi bilim jolyna qadam basý rýhanı jetilý jolyndaǵy mańyzdy baspaldaq sanalady.

Ózderińiz jaqsy bilesizder, Islamda bilimniń orny erekshe. Alla Taǵala qasıetti Quranda: «Rabbym, bilimimdi arttyr!» («Taha» súresi, 114-aıat) dep kórkem duǵa jasaýdy úıretken. Bul – musylmannyń ómir boıy izdenýi kerektigin meńzeıtin aıat. Búgingi saıys ta osy ustanymnyń naqty kórinisi dep bilemin», – dedi Bas múftı.

Ádilqazylar alqasynyń sheshimimen Ii respýblıkalyq «Úzdik ımam» ıntellektýaldy bilim saıysynyń jeńimpazdary tómendegideı:

- I oryn: Orazov Ádilhan Álıhanuly – Astana qalasy "Nursultan" meshitiniń naıb ımamy (500 myń teńge)

- II oryn: Nábı Nurdaýlet Asqaruly – Qyzylorda oblysy, Qazaly aýdandyq ortalyq «Janqoja batyr» meshitiniń bas ımamy (400 myń teńge)

- III oryn: Saıdolla Qýanysh Abdýrrahımuly – Mańǵystaý oblysy, Jańaózen qalasy, Teńge aýdandyq «Qosaı ata» meshitiniń naıb ımamy (300 myń teńge)

Sonymen qatar, jarysqa qatysyp, júldegerler qataryna enbegen ımamdarǵa 50 000 teńgeden yntalandyrý syıaqysy berildi.

Источник: Aisha