QMDB TÓRAǴASY IRAN DELEGATsIIaSYMEN SUHBATTASTY (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordada Álemdik jáne dástúrli din lıderleriniń VII sezi aıasynda Iran Islam Respýblıkasynyń Mádenıet jáne ıslamdyq baılanystar uıymynyń basshysy Muhammed Mahdı Imanıpýrmen kezdesti.
Kezdesýde eki eldiń baılanysy sóz boldy. Bas múftı men uıym basshysy qoǵamǵa adamgershilik qundylyqtardy nasıhattaýdyń mańyzy týraly oıyn bólisti. Sonymen qatar taraptar dinı tatýlyq pen ultaralyq kelisimdi nyǵaıtý jaıly áńgimelesip, Álemdik jáne dástúrli din lıderleri seziniń mańyzyna toqtaldy.
Naýryzbaı qajy Taǵanuly mártebeli meımanǵa qazaqstandyq ǵalymdardyń halqymyzdyń tarıhyna qatysty parsy tilinde jazylǵan tarıhı jádigerler men qundy eńbekterdi zertteý jumysyna qoldaý kórsetý qajettigin jetkizdi. Óz kezeginde Muhammed Mahdı Imanıpýr buǵan qatysty Iran tarapynan qoldaý kórsetiletinin jetkizdi. Kezdesýde ál-Farabı eńbekterin tereń zertteý máselesi de keńinen talqylandy.
Mádenıet jáne ıslamdyq baılanystar uıymynyń basshysy Muhammed Mahdı Imanıpýr Qazaqstan musylmandary dinı basqarmasynyń bastamalaryna izgi tilegin jetkizip, jyly lebizin bildirdi.
