QMDB TÓRAǴASY MEKTEP BITIRÝShI TÚLEKTERGE NASIHAT AITTY (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Qostanaı oblysyna jumys sapary barysynda «Jolyń bolsyn, jas túlek!» sharasyna qatysyp, Arqalyq qalasynyń mektep bitirýshi túlekterine nasıhat aıtty.
Arqalyq Qazaq jasóspirimder teatrynda ótken sharada QMDB Tóraǵasy: «Alda sizderdi ómirdiń jańa kezeńi – stýdenttik ómir kútip tur. Árqaısyńyz ata-anańyzdan jyraqtap, alys-jaqyn qalalarǵa, tipti alys-jaqyn shetelderge oqýǵa túsýlerińiz múmkin. Sol kezde eń bastysy adamdyq qasıetti saqtap qalýǵa tyrysyńyzdar. Qaıda júrseńizder de ádep saqtap, tazalyqqa, adaldyqqa mán berińizder. Jas bolǵannan keıin sizderdi alańdatatyn, qyzyqtyratyn, altyn ýaqyttaryńyzdy urlaıtyn bos dúnıeler kóp bolady. Mundaı da birinshi orynǵa oqýdy qoıyp, basy artyq kóńil kóterýden, oıyn-saýyq nemese jumystan boıdy aýlaq ustaǵan jón.
Jastyq shaq – eń alyp kúsh. Din men dástúrimizdiń qanaty keńge jaıylyp, ǵumyry uzaq bolýy úshin, eldiń jaǵdaıy jaqsaryp, qoǵamda turaqtylyq ornaýy úshin de jastardyń kómegi kerek-aq. Óıtkeni jastar – eldiń erteńi. Jastyq shaq – adam balasynyń qaıta aınalyp kelmeıtin kóktemi bolsa, búgingi jastar – erteńgi aqyl aıtar aǵa, urpaq tárbıeleıtin dana, eldiń aqsaqaly men aqjaýlyqty anasy. Al olar danalyqqa jetýi úshin qazirgi altyn ýaqyty arzan nársemen ótip ketpeýi tıis» dedi.
Shara sońynda QMDB Jastar isi sektorynyń uıymdastyrýymen «MUFTIYAT» baspasynan jaryq kórgen «Ýaqyt jáne sen», «Tabys teorııasy» rýhanı-tanymdyq, motıvatsııalyq kitaptary 140 mektep bitirýshi túlekke syıǵa berildi. Kitaptardy Bas múftı Naýryzbaı qajy Taǵanuly túlekterge arnaıy tabystap, sáttilik tiledi.
