QMDB TÓRAǴASY MYSYRDAǴY QAZAQ STÝDENTTERIMEN KEZDESTI (FOTO)

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Beıbarys Sultannyń 800 jyldyq mereıtoıyna oraı Mysyr Arab Respýblıkasyna resmı sapary barysynda osy elde bilim alyp jatqan qazaq stýdentterimen kezdesti.

Kezdesý Quran aıattaryn oqýmen bastalyp, QMDB Tóraǵasy duǵa jasady. Budan keıin Bas múftı «Talaba» qaýymdastyǵyna múshe qazaqstandyq stýdentterge Dinı basqarma atqaryp jatqan aýqymdy jumystardy tanystyryp, nasıhat aıtty.

«Biz árdaıym bilimdi mamandardyń qataryn kóbeıtýge kóńil bólip kelemiz. Bilimniń qubylasy sanalatyn Mysyr jerinde oqyp, Qazaqstanda eleýli ister atqaryp júrgen shákirtterimiz barshylyq. Paıǵambarymyzdyń (oǵan Allanyń salaýaty men sálemi bolsyn): «Tal besikten jer besikke deıin bilim izden» degen ósıetin esten shyǵarmaı, biliktiligin udaıy jetildirýge talpynyp júrgen shákirtterdiń talabyna nur jaýsyn. Elimizde asyl dinimizdiń órkendeýine, ilim-bilimniń jaıylýyna, ata-baba dástúrin jalǵastyrýǵa atsalysa berińizder» dedi Naýryzbaı qajy Taǵanuly. 

Sondaı-aq kezdesý barysynda Dinı basqarmanyń Mysyr Arab Respýblıkasyndaǵy turaqty ókili Rýslan Serǵazıev «Talaba» qaýymdastyǵy sońǵy jyldary atqarǵan aýqymdy sharalardy baıandap, qazaqstandyq stýdentterge turaqty túrde qamqorlyq kórsetip júrgen Bas múftı Naýryzbaı qajy Taǵanulyna alǵysyn bildirdi.

Kezdesý sońynda Bas múftı «Talaba» qaýymdastyǵyna, qazaq stýdentterine «MUFTIYAT» baspasynan jaryq kórgen kitaptardy saltanatty túrde syıǵa tartty.