QMDB tóraǵasy Mysyrdyń Ýaqyp mınıstrimen kezdesti (FOTO)
QMDB Tóraǵasy, Bas múftı Naýryzbaı qajy Taǵanuly Mysyr Arab Respýblıkasyndaǵy jumys kestesine oraı osy eldiń Ýaqyp mınıstri Muhammed Muhtar Jumamen kezdesti. Kezdesýde eki el arasyndaǵy ýaqypty damytý máselesi sóz boldy.
«Qazirgi tańda Nur-Múbarak ýnıversıteti bilim salasynda úlken jumystar atqarýda. Ózińizge osyndaǵy stýdentterge kórsetip jatqan qamqorlyqtaryńyz úshin erekshe alǵys aıtamyn. Bizdiń eki el arasyndaǵy tarıhı, baýyrlastyq baılanysty jańǵyrtý boıynsha kóp qoldaý kórsetip kelesiz. Nur-Múbarak ýnıversıtetindegi ustazdarǵa, dinı kadrlar daıyndaýda sińirip jatqan eńbekterińizge alǵys bildiremiz. Bizdiń elde stýdentterge dáris berip jatqan barsha mysyrlyq ustazdarǵa erekshe alǵys aıtamyn. Bizdiń elge arnaıy qonaq bolyp kelińiz. Ózińizdi arnaıy shaqyramyn», – dedi Bas múftı.
Óz kezeginde Muhammed Muhtar Juma Bas múftıdi jyly qabyldap, árkez qoldaý kórsetetinin jetkizdi. «Eki eldiń rýhanı baılanysyna atsalysamyz. Ustazdarymyzdy ózderińiz de qoldap kelesizder. Bizdiń elge jasaǵan saparyńyz ońynan bolsyn. Búgingi konferentsııada aıtqan oı-pikirlerińizdi qoldaımyz», – dedi Ýaqyp mınıstri.
Kezdesý barysynda Mysyr Arab Respýblıkasyndaǵy Tótenshe jáne ókiletti elshi Qaırat Lama Sharıf te ortaq jobalarǵa demeý kórsetýge daıar ekenin aıtty. Kezdesý sońynda Bas múftı mınıstrdi elimizge Dástúrli din lıderleriniń sezine shaqyrdy. Muhtar Juma qonaq bop keletinin málimdedi.
