QMDB tóraǵasy óner jáne mádenıet qaıratkerlerimen júzdesti (FOTO)
Bas múftı Naýryzbaı qajy Taǵanuly Almaty qalasyna jasaǵan sapary barysynda mádenıet, óner jáne sport maıtalmandarymen júzdesti.
QMDB Tóraǵasy jıylǵan qaýymdy Táýelsizdigimizdiń 30 jyldyǵymen quttyqtap, otbasylaryna amandyq, el úshin atqaryp jatqan eńbekterine bereke tiledi.
«Táýelsizdikke qol jetkizgen kúnnen bastap elimiz Ekonomıkalyq turǵydan da, rýhanı turǵydan da eleýli ilgerileýge qol jetkizdi. Sonyń ishinde dinı ahýal jaqsardy, din salasynda aıtarlyqtaı jumystar atqaryldy. Táýelsizdik eldegi óner men bilim-ǵylymnyń, ádebıet pen mádenıettiń de tynysyn ashty. Bul turǵyda sizderdiń de eńbekterińiz eren. Qazaqstan musylmandary dinı basqarmasy ózderińiz sekildi el aǵalary, ult janashyrlary, zııaly qaýym ókilderiniń aqyl-keńesine júginip otyrýdy esten shyǵarǵan emes. Búgingi basqosýymyz da bárimiz úshin mándi, maǵynaly bolaryna shúbá joq. Qazaqta «Jaqsymenen ótkizgen jarty saǵat, jamannyń ótip ketken ómirindeı» degen jaqsy sóz bar. Shynynda, sizderdiń oı-pikirlerińiz biz úshin qundy» dedi Naýryzbaı qajy Taǵanuly.
Basqosýda Islam Jemeneı, Tuńǵyshbaı Jamanqulov, Altynbek Qorazbaev, Marat Toqashbaev, Jarylqasyn Dáýlet bastaǵan óner men mádenıettiń tarlandary Dinı basqarmanyń izgi jumystaryna tabys tilep, usynys-tilekterin ortaǵa saldy. Alqaly basqosýdy naıb múftı Kenjeáli Qońyratbaıuly júrgizdi.
