QMDB TÓRAǴASY ÓZBEKSTANNAN KELGEN NAIB MÚFTIDI QABYLDADY (FOTO)
Elordada Bas múftı Naýryzbaı qajy Taǵanuly Ózbekstan musylmandary dinı basqarmasy tóraǵasynyń birinshi orynbasary Hamıtjan Ishmatbekovty qabyldady.
Kezdesýde Álemdik jáne dástúrli dinder lıderleri seziniń dinaralyq dostyqty arttyrýdaǵy róli, túrki memleketteriniń rýhanı birligin, ortaq dinı senimin, salt-dástúrin jáne ortaq muralaryn dáripteý máselesi talqylandy.
Bas múftı Qazaqstan musylmandary dinı basqarmasynyń túrki memleketteriniń «Múftıler alqasyn» qurý týraly bastamasynyń mańyzdylyǵyn aıryqsha atap ótti.
«Ózińizge málim, biz kıeli Túrkistan qalasynda túrkitildes memleketteriniń «Múftıler alqasyn» ótkizdik. Oǵan sizder de qatysyp, belsendilik tanyttyńyzdar. Allaǵa shúkir, qazir túrki memleketteriniń arasyndaǵy Ekonomıkalyq, áleýmettik, áriptestik baǵytyndaǵy baılanystar nyǵaıyp keledi. Endigi kezekte rýhanı baılanysty arttyrý asa mańyzdy baǵyttyń biri bolyp otyr» dedi Naýryzbaı qajy Taǵanuly.
Kezdesý sońynda taraptar eki el arasynda qalyptasqan tarıhı ári rýhanı baılanysty arttyra túsýge ýaǵdalasty.
