QMDB Tóraǵasy qala bas ımamynyń qyzmetine sáttilik tiledi

QMDB Tóraǵasy, Bas múftı Naýryzbaı qajy Taǵanuly elordadaǵy Áziret Sultan meshitine arnaıy kelip, jamaǵatpen júzdesti. Bas múftı meshitte besin namazyn júrgizip, kópshilikke ýaǵyz-nasıhat aıtty.

Kezdesý barysynda Bas múftı jamaǵatqa Astana qalasynyń jańadan taǵaıyndalǵan bas ımamy Nurbek Áýeshanulyn tanystyryp, onyń osy ýaqytqa deıingi eńbek joly men dinı saladaǵy qyzmetine qysqasha toqtaldy. Sonymen qatar jańa qyzmetine sáttilik tilep, elordadaǵy dinı-aǵartý jumystaryn júıeli túrde jalǵastyrýdyń mańyzyn atap ótti.

Ýaǵyz barysynda musylman qaýymyn birlikke, izgilikke, yntymaq pen baýyrmaldyqqa úndegen Bas múftı aldaǵy Qurban aıt meıramynyń rýhanı mánine de toqtalyp, jamaǵatty ıgi amaldar jasaýǵa shaqyrdy.

Jıyn sońynda el tynyshtyǵy men jurt amandyǵy úshin duǵa jasalyp, jamaǵat Bas múftıge izgi tilekterin bildirdi.

Источник: Aisha