QMDB tóraǵasy Qalaýyn sultan meshitine zııarat jasady (FOTO)
Mysyrǵa sapary barysynda Bas múftı Naýryzbaı qajy Taǵanuly bastaǵan QMDB delegatsııasy Kaırdegi Qalaýyn sultan meshitine baryp, qabirin zııarat etti.
Meshit qyzmetkeri delegatsııa múshelerine tarıhtan syr shertetin ǵımarat jaıynda jan-jaqty málimet berdi. Ol Mámlúk sultandyǵyn qurǵan yqpaldy tulǵalar arasynda Aıbek, Qutyz, Beıbarys sultandarmen birge Qalaýyn sultannyń da esimi jıi atalatynyn atap ótti.
Qalaýyn sultan óz zamanynda Islam órkenıeti men Mysyrdyń damýyna zor úles qosqan. Ol Kaırde záýlim medrese saldyryp, buryn-sońdy bolmaǵan Kaır aýrýhanasyn turǵyzǵan.
Qalaýyn sultan meshiti Mysyrdaǵy eń kóne ǵımarattyń biri sanalady. Meshitte ystyq aýany salqyn aýamen almastyratyn tabıǵı jeldetkish júıesi bar. Al minberdegi ımam daýysy búkil meshit ishine tolyqtaı estiledi. 1284-1285 jyldary salynǵan bul ǵımaratta sáýlet óneriniń ozyq úlgileri kórinis tapqan. Kóne meshitti zııarat etýshiler sany jyl saıyn artyp keledi. Aıta ketetin taǵy bir jaıt, meshit qabyrǵalary men esik jaqtaýlarynda qazaqtyń qoshqar múıiz oıýy beınelengen.
Bas múftımen birge meshitti aralaǵan Qazaqstannyń Mysyr Arab Respýblıkasyndaǵy Tótenshe jáne ókiletti elshisi Qaırat Lama Sharıf delegatsııa múshelerine tarıhı derekterden syr shertti. «Qalaýyn sultan 1279 jyly 57 jasynda Mysyr men Sham eliniń bıleýshisi bolyp taqqa otyrdy. Qalaýyn men onyń urpaqtary Mámlúkter memleketin 103 jyl boıy basqarǵan. Jergilikti halyq qypshaq sultany Qalaýyndy 11 jyl boıy ádiletti bılik júrgizgeni úshin qatty qurmettegen. Esimi arab tarıhynda altyn árippen jazylǵan, «qara qyldy qaq jarǵan» Qalaýyn sultannyń esimin qarapaıym halyq osy kúnge deıin zor qoshemetpen ataıdy» dedi Qaırat Lama Sharıf.
Qalaýyn sultan meshiti aýmaǵynda Qalaýynnyń ózi jáne uly Nasyr Muhammed pen nemeresi Imad ad-dın jerlengen. Bas múftı bastaǵan delegatsııa Quran aıattaryn oqyp, olardyń rýhyna duǵa baǵyshtady.
