QMDB TÓRAǴASY QAJYLARDY ULY SAPARǴA ShYǴARYP SALDY (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almaty halyqaralyq áýejaıynda qajylardy qasıetti mekenge shyǵaryp saldy.
Bas múftı uly saparǵa attanyp bara jatqan qajylarǵa sát-sapar tilep, bes paryzdyń biri qajylyq qulshylyǵynyń mán-mańyzyna toqtaldy.
«Allanyń qalaýymen, Haq Taǵalanyń shaqyrtýymen qasıetti Qaǵbatýllaǵa qajylyqqa attanyp barasyzdar. Alla saparlaryńyzdy múbarak etsin! Ardaqty Paıǵambarymyz (oǵan Allanyń salaýaty men sálemi bolsyn): «Jaman sóz sóılemeı, kúnáli ári orynsyz eshnárse jasamaı, Allaǵa qajylyq jasaǵan adam anasynan jańa týǵandaı (kúnásiz) oralady» degen. Endeshe osy uly saparda Alla Taǵala barsha otandastyrymyzǵa Óziniń jeńildigin berip, aman-esen elge oralýyn, kórkem qulshylyq jasaýdy násip etsin!» dedi Naýryzbaı qajy Taǵanuly.
Sondaı-aq uly saparǵa jınalǵan qajylarǵa Saýd Arabııasy Koroldiginiń Qazaqstandaǵy elshisi Faısal ben Hanıf ál-Kahtanı aq jol tilep, qajylyq paryzyn aman-esen ótep kelýlerine tilektestigin bildirdi.
Aıta keteıik, bıyl elimizden 4000 adam qajylyq paryzyn óteıdi. Otandastarymyzǵa 18 qajylyq kompanııasy qyzmet kórsetedi. QMDB janynan qurylǵan Qajylyq mıssııasy uıymdastyrý-úılestirý, alǵashqy medıtsınalyq kómek, ýaǵyz-nasıhat, pátýa berý, aqparat taratý jumystarymen aınalysady.
