QMDB tóraǵasy qajylyq máseleleri boıynsha kelissózder júrgizdi (FOTO)

11 mamyr 2022 3973 0 Оqý rejımi

Búgin QMDB Tóraǵasy, Bas múftı Naýryzbaı qajy Taǵanuly bastaǵan delegatsııa jumys saparymen Saýd Arabııa Koroldigine keldi. Delegatsııa jumys saparyn SAK Qajylyq jáne umra mınıstri Taýfık ıbn Faýzan ar-Rabıa myrzamen kezdesýden bastady.

Kezdesýde bıylǵy qajylyqty uıymdastyrý máseleleri sóz boldy. Bas múftı Qazaqstan musylmandarynyń sálemin jetkizip, delegatsııaǵa kórsetken qurmeti úshin rızashylyǵyn bildirdi.

Kezdesýde Naýryzbaı qajy Taǵanuly qazaqstandyq qajylarǵa barynsha qolaıly jaǵdaı jasaý boıynsha óz usynysyn jetkizdi. Onyń ishinde eń mańyzdysy qajylardy jetkizetin áýe tasymalynyń tıimdi baǵada bolýy týrasynda kelissózder júrgizildi. Óıtkeni charterlik áýe reısteriniń baǵasy qazaqstandyq qajylar úshin qymbatqa soǵýda.

«Eki jyldyq pandemııalyq úzilisten keıin úlken qajylyqtyń qaıta bastalǵanyna qýanyshtymyz. Qazaqstan musylmandaryna qajylyǵyn qolaıly óteý úshin jasalyp jatqan múmkindikter úshin alǵys aıtamyz. Endigi maqsat qajylarǵa qajetti jaǵdaı jasaý. Osy baǵytta ózińiz basqaryp otyrǵan mınıstrlikpen kelisimge kele otyryp, ekijaqty jumys júrgizý», – dedi Bas múftı.

Al óz kezeginde SAK Qajylyq jáne umra mınıstri Taýfık ıbn Faýzan ar-Rabıa qazaqstandyq qajylarǵa barynsha qoldaý kórsetetinin aıtty.

«Qazaqstan musylmandaryna menen de duǵaı sálem joldańyz. Men Qazaqstanda birer jyl buryn issaparmen boldym. Ózińiz bastap kelgen QMDB delegatsııasymen kezdeskenime qýanyshtymyn. Úlken qajylyq barysynda qoldaýǵa ázirmiz», – dedi mınıstr myrza.

Qajylar úshin 50/50 charterlik áýe tasymalynyń qymbatqa túsýine baılanysty jeńildikter jasaý týraly Bas múftıdiń ótinishine qatysty Qajylyq jáne umra mınıstri Taýfık ıbn Faýzan ar-Rabıa bul tek qana Qazaqstanǵa emes búkil álemge qoıylǵan talap ekenin jáne úshinshi memleket arqyly turaqty reıspen tasymaldaýǵa ruqsat joq ekenin aıtty. Degenmen bul máselege qatysty tikeleı ókiletti jáne jaýapty SAK Azamattyq avıatsııa Bas uıymy (GACA) arqyly sheshý úshin kelissózder júrgizýge qolaıly jaǵdaı jasalatynyn atap ótti. Sondaı-aq ekijaqty kezdesý barysynda bıyl qazaqstannan 3 000 adam qajylyq paryzyn óteıtini týraly kelisildi.

Sonymen qatar Saýd Arabııa tarapy Qazaqstanǵa berilgen resmı 3 myń qajylyq oryndarynan tys bólek SAK aýmaǵyna qajylyq maýsymynda kirýine eshkimniń jol bermeıtindigin ashyp aıtty.

Búgingi Qajylyq jáne umra mınıstrimen bolǵan kezdesýge QMDB delegatsııasy jáne Jıddadaǵy Bas konsýl Talǵat Shaldanbaı qatysty.

Aıta keteıik, buǵan deıin QMDB 3 000 qajylyq oryndarynyń 14 týrıstik operatorlarǵa konkýrstyq negizde berilgenin jarııalaǵan bolatyn.