QMDB tóraǵasy Qurban aıttyń mańyzy týraly juma ýaǵyzyn aıtty (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elordadaǵy respýblıkalyq «Áziret Sultan» meshitinde «Qurban aıt – ulyq mereke» taqyrybynda juma ýaǵyzyn aıtty.
Bas múftı meshit jamaǵatyn san ǵasyrlardan beri halqymyzdyń ıgi dástúrimen bite qaınasyp ketken qurban aıt meıramymen quttyqtap, ulyq merekeniń mańyzyna, tarıhy men hıkmetine toqtaldy.
«Qurban shalý – paıǵambarlardyń atasy Ibrahım paıǵambardyń (oǵan Allanyń sálemi bolsyn) súnneti. Bul dástúr bizdiń úmmetke de mura bolyp qalǵan. Zaıd ıbn Árqamnan (Alla oǵan razy bolsyn) jetken hadıste ardaqty Paıǵambarymyzdan (oǵan Allanyń salaýaty men sálemi bolsyn) adamdar: «Ýa, Allanyń Elshisi! Qurbandyq degen ne ózi?» – dep suraǵanda, Alla Elshisi (oǵan Allanyń salaýaty men sálemi bolsyn): «Atalaryń Ibrahım paıǵambardyń (oǵan Allanyń sálemi bolsyn) súnneti», – dep jaýap bergen. Sodan soń: «Odan bizge qandaı saýap bar?» – dep suraq qoıylady. Alla Elshisi (oǵan Allanyń salaýaty men sálemi bolsyn): «Árbir tal qylshyǵy úshin saýap alasyńdar»,– deıdi.
Qasıetti qurban aıt merekesinde qurban shalyp, joq-jitikterge járdemdesý, qurbandyq etinen taratý saýaby mol is. Alaıda, qurban shalýdy nıet etken árbir jan eń aldymen qurbandyǵynyń durys bolýyna asa mán berýi qajet» dep atap ótti Naýryzbaı qajy Taǵanuly.
Juma namazynan keıin QMDB Tóraǵasy jamaǵatpen birge duǵa jasap, eldiń amandyǵyn, tynyshtyǵyn tiledi.
