QMDB tóraǵasy Qyrǵyzstan múftıimen júzdesti (FOTO)
Bas múftı Naýryzbaı qajy Taǵanuly Qyrǵyzstan musylmandary dinı basqarmasynyń tóraǵasy Zamır qajy Rakıevpen kezdesti. Kezdesýde baýyrlas elderdiń dinı saladaǵy baılanysyn nyǵaıtýdyń mańyzy sóz boldy.
«Qazaq-qyrǵyz halqynyń dini men dili bir. Alla Taǵala eki eldiń baýyrlastyǵyn bekem etkeı. Táýelsizdigimiz baıandy bolǵaı. Shaqyrtýymyzdy qabyl alyp, halyqaralyq konferentsııamyzǵa kelgenińiz úshin sizge úlken rızashylyǵymdy bildiremin», – dedi Naýryzbaı qajy Taǵanuly.
Óz kezeginde Qyrǵyzstan múftıi Zamır Rakıev Naýryzbaı qajy Taǵanulynyń jumysyna sáttilik tilep, izgi nıetin jetkizdi.
Aıta ketsek, Nur-Sultan qalasynda Qazaqstan musylmandary dinı basqarmasynyń uıymdastyrýymen el egemendiginiń 30 jyldyq mereıtoıyna oraı «Táýelsiz Qazaqstan jáne Islam qundylyqtary» taqyrybynda halyqaralyq ǵylymı-tájirıbelik konferentsııa ótedi. Konferentsııa jumysyna shetel múftıleri men elshileri qatysady.
