QMDB TÓRAǴASY QYRǴYZSTAN MÚFTIIN JAŃA QYZMETIMEN QUTTYQTADY

QMDB Tóraǵasy, Bas múftı Naýryzbaı qajy Taǵanuly Abdýlazız qajy Zakırovty Qyrǵyzstan musylmandary dinı basqarmasynyń tóraǵasy, Bas múftı laýazymyna saılanýymen quttyqtady.

«Sizdi Qyrǵyzstan musylmandary dinı basqarmasynyń tóraǵasy, Bas múftı laýazymyna saılanýyńyzben shyn júrekten quttyqtaımyn!

Sizge Qazaqstandaǵy musylman jamaǵattyń ıgi tilegi men izgi nıetin jetkizemin. Alla Taǵala saýapty da jaýapty qyzmetińizge abyroı men bereke násip etsin. Qazaq-qyrǵyz baýyrlastyǵy qııametke deıin baıandy bolsyn!

Sizdiń jańa qyzmetińiz Qazaqstan jáne Qyrǵyzstan musylmandary dinı basqarmalary arasyndaǵy áriptestik ári baýyrlastyq baılanysty odan ári nyǵaıta túsedi degen senimdemin.

Jaratýshy Jabbar Iemiz jańa jumysyńyzǵa jar bolyp, ıgi bastamalaryńyzǵa sáttilik násip etkeı. Ámın!» delingen Naýryzbaı qajy Taǵanulynyń quttyqtaý hatynda.

Derekkóz: QMDB Baspasóz qyzmeti