QMDB TÓRAǴASY STÝDENTTERDI ÁS-SYǴNAQI EŃBEKTERIN TEREŃ OQÝǴA ShAQYRDY (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almaty qalasyna barǵan saparynda qazaq dalasynan shyqqan kórnekti ǵulama-ǵalym Hýsamýddın ás-Syǵnaqıdyń 800 jyldyq mereıtoıyna oraı uıymdastyrylǵan «Islam órkenıeti keńistigindegi Hýsamýddın ás-Syǵnaqı murasy» halyqaralyq ǵylymı-tájirıbelik konferentsııasyna qatysyp, stýdentterge nasıhat aıtty.
Nur-Múbárak ýnıversıtetiniń shákirtterin tereń bilim alýǵa úndegen Bas múftı: «Osy rette stýdentterimizdi dinı rýhanı keńistigimizdegi búgingi kúnniń túıtkildi dinı tereń suraqtarǵa tushymdy, bultartpas dáleldermen jaýap berý úshin osy salada jazylǵan ás-Syǵnaqı eńbekterine tereń boılap, ǵylym ıgerýge shaqyramyn. Óıtkeni ǵulamanyń bul saladaǵy eńbekteri elimizdegi Ábý Hanıfa fıqh mektebin jáne Matýrıdı aqıda mektebin zertteýde, oqytyp-úıretýde qundy ǵylymı ádebıetterdiń biri sanalady» dedi.
