QMDB TÓRAǴASY TANYMAL SPORTShYLARMEN SUHBATTASTY (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly elimizge tanymal sportshylarmen kezdesti.
QMDB-nyń Almaty oblysy boıynsha ókildiginiń uıymdastyrýymen tabıǵat aıasynda ótken erkin pikir almasý formatyndaǵy basqosýǵa Qazaqstan jekpe-jek óneri qaýymdastyǵynyń vıtse-prezıdenti Sársen Quranbek, belgili sport sheberleri – Ardaq Nazarov, Beıbit Ystybaev, Danııar Qasqaraýov, Nurbaqyt Teńizbaev, Rýslan Ábdirazaq, Almat Kebispaev, Darhan Áshirov, Janqosh Turarov, Arman Áshimov t.b. chempıondar qatysty.
Bas múftı basqosýda elimizdegi musylman qaýymynyń, onyń ishinde el namysyn álemdik deńgeıde qorǵap júrgen sport sheberleriniń rýhanı birligin nyǵaıtýdyń, baýyrmashyldyqty arttyrýdyń mańyzyn aıryqsha atap ótti.
«Barshamyzdyń maqsatymyz ortaq. Ortaq maqsatymyzǵa jetý úshin eń áýeli óz aramyzda birlik pen baýyrmaldyq qasıetti bekem etýimiz qajet. Baýyrmashyldyq – Alla Taǵalanyń musylman úmbetine bergen uly nyǵmetteriniń biri. Alla úshin baýyr bolǵandardyń arasynda dúnıelik maqsattar men jekke múddeler kózdelmeıdi. Óıtkeni, Allanyń razylyǵy kózdelgen iste yqylas pen shynaıy amaldar júzege asady. Alla Taǵala kók týymyzdy kókte jelbiretip, táýelsizdigimizdi baıandy etsin», – dedi basqosýda Bas múftı Naýryzbaı qajy Taǵanuly.
Sportshylar kezdesýge uıytqy bolǵan din qyzmetkerlerine alǵys aıtyp, Dinı basqarma bastamalaryn qoldaıtynyn jetkizdi.
Kezdesýden keıin chempıondar gir tasyn kóterý, sadaq atý, beltemirge tartylý syndy sport túrlerinen kúsh synady. Bas múftı jeńimpazdardy dıplommen marapattap, káde-syı tartý etti.
Источник: Aidos
