QMDB TÓRAǴASY «TARIHYŃDY TANY» JOBASYN JÚZEGE ASYRÝDY USYNDY (FOTO)
Búgin Ulytaý oblysynda ótken respýblıkalyq ǵylymı-tájirıbelik konferentsııada baıandama jasaǵan Bas múftı Naýryzbaı qajy Taǵanuly jas býyn ókilderi arasynda «Tarıhyńdy tany» tanymdyq jobasyn júzege asyrýdy usyndy.
«Rasynda, óskeleń urpaqtyń tarıhı sanasyna silkinis jasaýda Ulytaýdyń orny erekshe. Kópshilik qaýym bul jerge Joshy han, Alasha han, Dombaýyl kesenelerin, Han ordasy men Áýlıetaýdaı kıeli oryndardy kórý úshin arnaıy keledi. Túrkııa elinde oqýshylardyń jazǵy demalysynda júzege asatyn keremet joba bar. Mektep muǵalimderi jaz boıy mektep oqýshylarynyń Túrkııanyń tarıhı oryndaryna arnaıy saıahatyn uıymdastyrady.
Tarıhshylar óz eliniń árǵy-bergi tarıhyn jastarǵa táptishtep túsindirip, jetesine jetkizedi. Biz osy tájirıbeni alyp, óz elimizde jastar arasynda «Tarıhyńdy tany» jobasy aıasynda tarıhı tanymdyq sapar uıymdastyrýdy usynar edim. Kóp estigennen bir kórgen artyq demeı me?! Bul joba jas býyn ókilderiniń bilim kókjıegin keńeıtip qana qoımaı, olardyń boıyna ultjandylyq, otanshyldyq sezimderdi uıalatýǵa yqpal eter edi» dedi Naýryzbaı qajy Taǵanuly.
